ब्राइटनका इनोकद्वारा २४ वर्षकै उमेरमा सन्यास

काठमाडौं । इंग्लिस प्रिमियर लिग क्लब ब्राइटनका मिडफिल्डर इनोक एमवेपूले फुटबल खेल जीवनबाट सन्यास घोषणा गरेका छन् ।

मुटुको समस्याको कारण जाम्बियाका मिडफिल्डर इनोकले २४ वर्षकै उमेरमा सन्यास लिएका हुन् ।

इनोकले सोमबार सामाजिक संजाल ट्वीटरबाट सन्यासको घोषणा गरेका हुन् ।

'उच्च स्तरमा फुटबल खेल्ने आफ्नो सपना पछ्याउन उनी बलियो थिए र भगवानको कृपाले उनले प्रिमियर लिगमा पुगेर आफ्नो सपना पूरा गरे,' इनोकले लेखेका छन्, 'केही सपनाहरू अन्त्य हुन्छन्, त्यसैले यो दुखको साथमा मैले पाएको चिकित्सा सल्लाहको कारणले मेरो फुटबल जुत्ता झुण्ड्याउने घोषणा गर्दछु । यद्यपि यो फुटबलसँग मेरो संलग्नताको अन्त्य होइन, म यसमा संलग्न रहने योजनामा छु ।'

'म मेरो फुटबल यात्रामा मेरो श्रीमती र परिवार, मेरो एजेन्ट, जाम्बियन एफए, मेरा सबै अघिल्ला क्लबहरू, टोलीका साथीहरू र प्रशिक्षकहरू र ब्राइटनमा रहेका सबैजनालाई मेरो फुटबल यात्रामा सहयोग गर्ने सबैलाई धन्यवाद दिन चाहन्छु,' उनले लेखेका छन् ।

मिडफिल्डर इनोकलाई वंशाणुगत मुटुको समस्या रहेको बताईएको छ । अब मैदान उत्रिएमा उनलाई घातक हृदयघात हुने जोखिम रहेको बताईएको छ ।

जाम्बियाको राष्ट्रिय टोलीसँग सामेल हुन जाम्बियाको उडानको क्रममा उनी बिरामी परेका थिए । त्यसपछि उनले ब्राइटन फर्कनु अघि मालीको अस्पतालमा स्वास्थ्य जाँच गरेका थिए ।

उनी अष्ट्रियाको आरबी साल्जवर्गबाट २०२१ मा ब्राइटन आएका थिए ।