काठमाडौं । साविक विजेता रियल मड्रिडले यूईएफए च्याम्पियन्स लिग फुटबलमा जित निकालेको छ ।
समूह चरण अन्तर्गत बुधबार राति भएको खेलमा रियलले शाख्तर डोनेक्ट्सलाई २-१ गोल अन्तरले हराएको हो ।
रियललाई जित दिलाउन रोड्रिगो र भिनिसियस जुनियरले एक एक गोल गरे ।
शाख्तरका ओलेकसान्दर जुब्कोभले एक गोल फर्काए ।
खेलको १३ औं मिनेटमा रोड्रिगोले गोल गर्दै रियललाई सुरुआती अग्रता दिलाएका थिए ।
२८ औं मिनेटमा जुनियरले गोल गर्दै टिमको अग्रता २-० को बनाए ।
त्यसपछि खेलको ३९ औं मिनेटमा शाख्तरका जुब्कोभले एक गोल फर्काएपनि रियल विजयी भयो ।
रियलको यो समूह चरणमा लगातार तेस्रो जित हो ।
२०१४/१५ को सिजनपछि पहिलो पटक रियलले समूह चरणमा लगातार तीन खेल जितेको हो ।
यस जितसँगै रियल नकआउट चरणको नजिक पुगेको छ ।
समूह 'एफ' को रियल ३ खेलमा ९ अंक जोडेर शीर्ष स्थानमा रहेको छ ।
शाख्तर ४ अंक जोडेर दोस्रो स्थानमा रहेको छ ।
