हालाण्डको ह्याट्रिकमा सिटीको पुनरागमन जित

काठमाडौं । इंग्लिस प्रिमियर लिग फुटबलमा साविक विजेता म्यानचेस्टर सिटीले पुनरागमन जित  निकालेको छ ।

शनिबार राति भएको खेलमा सिटीले क्रिस्टल प्यालेसलाई ४-२ गोल अन्तरले हराएको हो ।

घरेलु मैदानमा सिटीलाई जित दिलाउन अर्लिङ हालाण्डले ह्याट्रिक गरे । बेर्नार्डो सिल्भाको नाममा एक गोल रह्यो ।

क्रिस्टल प्यालेसका जोआचिम एण्डरसनले एक गोल गर्दा सिटीका जोन स्टोन्सले एक आत्मघाती गोल गरे ।

घरेलु मैदानमा दुई गोलको अग्रता उल्टाएर सिटीले जित निकालेको हो ।

खेलको चौंथो मिनेटमा स्टोन्सले आत्मघाती गोल गरेपछि क्रिस्टलले सुरुआती अग्रता बनाएको थियो ।

खेलको २१ औं मिनेटमा एण्डरसनले गोल गर्दै किस्टललाई २-० को अग्रता दिलाए ।

तर, दोस्रो हाफमा सिटी खेलमा फर्कियो ।

खेलको ५३ औं मिनेटमा सिल्भाले गोल गर्दै सिटीलाई २-१ को स्थितिमा ल्याए ।

खेलको ६२ औं मिनेटमा हालाण्डले गोल गर्दै सिटीलाई २-२ को बराबरीमा ल्याए ।

७० औं मिनेटमा हालाण्डले व्यक्तिगत दोस्रो गोल गर्दै टिमको अग्रता ३-२ को बनाए ।

त्यसपछि खेलको ८१ औं मिनेटमा हालाण्डले ह्याट्रिक पूरा गर्दा सिटी ४-२ ले विजयी भयो ।

यस जितसँगै सिटी लिगको शीर्ष स्थानमा उक्लिएको छ ।

सिटीले ४ खेलमा १० अंक जोडेको छ ।

क्रिस्टल प्यालेस ४ अंक जोडेर १३ औं स्थानमा रहेको छ ।