दिलिप मास्टर ओपनको फाइनलमा
काठमाडौं । चौथो संस्करणको धनलक्ष्मी स्मृति राष्ट्रिय स्क्वाश प्रतियोगिताको सेमिफाइनल समिकरण पुरा भएको छ ।
बिहीबार भएको मास्टर ओपनको फाइनलमा दिलिप अधिकारी पुग्न सफल भए । दिलिपले कर्नेल इन्द्र बहादुर कार्कीलाई २–१ ले पछि पारेर रिटार्यड हर्टका आधारमा जित निकाले ।
बिहीबारनै भएको प्लेट च्याम्पियनसिपको दोस्रो सेमिफाइनलमा राजकृष्ण महर्जनले कमल शाक्यलाई ३–१ को सेटमा हराए । राजकृष्णले कमललाई ४–११, ११–५, ११–९, ११–९ स्कोरले पराजित गरे ।
सोही स्पर्धामा प्रयाग जोशीले जुनिल शाक्यलाई ३–१ को सेटमा पराजित गर्दै फाइनल पुग्न सफल भए । प्रयागले जुनिललाई १२–१०, ११–३, ८–११, ११–३ स्कोरले हराए ।
भोलि शुक्रबार मेन्स ओपन, मास्टर ओपन, महिला ओपन तथा ब्वाईज यु–१९ विधाका सम्पुर्ण सेमिफाईनलका खेल सञ्चालन हुनेछ ।
साउन २१ गतेसम्म चल्ने प्रतियोगितामा पुरुष खुल्ला, महिला खुल्ला, मास्टर खुल्ला पुरुष ५० वर्ष भन्दा माथि, जुनियर ब्वाईज ओपन र प्लेट गरी ५ विधा समावेश गरिएको छ ।
पुरुषतर्फको विजेताले २५ हजार, उपविजेताले १५ हजार र तेस्रोले ९/९ हजार पाउने छन् । महिलातर्फ विजेताले १८ हजार, उपविजेताले ११ र तेस्रोले ७/७ हजार पाउने छन् ।
यस्तै जुनियरतर्फ विजेताले १० हजार, उपविजेताले ६ हजार र तेस्रोले ४/४ हजार पाउने छन् । प्रतियोगिता आयोजनाका लागि प्रायोजक फाउन्डेसनले १ लाख ३५ हजार नगद पुरस्कार उपलब्ध गराउनेछ ।
अघिल्लो संस्करणमा पुरुषतर्फ अरहान्त केशर सिंह र महिलातर्फ भावना सुनुवारले उपाधि जितेका थिए ।
