एनआरटी र थोनबुरी भिड्दै

काठमाडौं । थाइल्याण्ड भ्रमणमा रहेको नेपालको 'ए' डिभिजन क्लब न्युरोड टिम (एनआरटी) ले आज बुधबार तेस्रो मैत्रीपूर्ण खेल खेल्दैछ ।

एनआरटीले आज थाइल्याण्डको तेस्रो डिभिजनको क्लब थोनबुरी एफसीसँग प्रतिस्पर्धा गर्नेछ । खेल दिउँसो २:४५ बजे सुरु हुनेछ ।

एनआरटीले यस अघि शीर्ष डिभिजनको क्लब चोनबुरी एफसी र तेस्रो डिभिजनको कासेम बन्डित युनिभर्सिटी एफसीसँग मैत्रीपूर्ण खेलेको थियो ।

चोनबुरीसँग ९-० ले पराजित एनआरटी कासेमसँग ५-२ गोल अन्तरले पराजित भएको थियो ।

प्रि-सिजनको तयारीका लागि एनआरटीको टोली थाइल्याण्ड पुगेको हो ।

थाइल्याण्ड जानु अघि एनआरटीले मलेसियामा टुवान याङ टेरुतमा (टीवाईटी) कप फुटबल प्रतियोगिता खेलेको थियो । उक्त प्रतियोगिताको दुबै खेलमा एनआरटीले हार व्यहोरेको थियो ।