यू-२० साफको उपाधि र एसियन कपमा छनोट हुने लक्ष्य

काठमाडौं । नेपाली यू-२० राष्ट्रिय फुटबल टोलीले छोटो समयमा दुई ठुला प्रतियोगिता साफ यू-२० च्याम्पियनसिप र एएफसी यू-२० एसियन कप छनौट खेल्दैछ ।

दुई प्रतियोगिताका लागि नेपाली टोलीले दैनिक दुई पटक प्रशिक्षण गरिरहेका छन् ।

मुख्य प्रशिक्षक मेघराज केसीको नेतृत्वमा युवा टोली उपाधि जित्ने लक्ष्यसहित तयारीमा लागेका छन् ।

नेपाली युवा टोली प्रतियोगिताका लागि निकै मेहेनत गरिरहेका छन् । किनकी युवा टोली भारतमा आयोजना हुने यू-२० साफ जित्दै बहराइनमा हुने एएफसी यू-२० एसियन कप छनौटबाट एसियन कपमा पुग्न चाहन्छ ।

छोटो समयको तयारी बाबजुत यू-२० साफको उपाधि र यू-२० एसियन कपमा छनोट हुने लक्ष्यमा केन्द्रित भएर तयारी गरिरहेको नेपाली टोलीका मिडफिल्डर आयुष घलान बताउछन् ।

'समय कम भएकोले दिनमा दुई पटक ट्रेनिङ भईरहेको छ । हाम्रो फोकस साफ नै हो । साफको फाइनल जित्ने । त्यसपछि एएफसी एसियन कपमा छनोट हुने लक्ष्य छ,' नेपाली राष्ट्रिय टोलीका नियमित सदस्य समेत रहेका आयुषले भने ।

नेपाली टोलीका अर्का मिडफिल्डर कृतिस रत्न छुन्जुले उपाधि जित्नकै लागि टोलीले तयारी गरिरहेको बताए ।

'तयारी राम्रो भईरहेको छ । जित्नलाई पूरा तयारी भईरहेको छ । टिममा कोअर्डिनेशन पनि राम्रो भईरहेको छ,' कृतिसले भने, 'जित्नका लागि खेलिन्छ । यो प्रतियोगिता जितेर नै एएफसी एसियन कपमा जान्छौं । हरेक प्रतियोगिताको उपाधी जित्न कै लागि खेलिन्छ यसमा पनि त्यहीँ हुन्छ ।'

यू-२० टोलीको बन्द प्रशिक्षणमा ३० खेलाडी रहेका छन् । यहिँ ३० खेलाडीबाट साफ यू-२० र एएफसी यू-२० एसियन कप छनौट खेल्ने नेपाली टोलीको घोषणा गरिनेछ ।

नेपालले सुरुआतमा साफ यू-२० च्याम्पियनसिप खेल्नेछ । जसमा आयोजक भारतसँगै नेपाल, माल्दिभ्स, श्रीलंका र बंगलादेशको सहभागिता रहेको छ ।

भुवनेश्वरस्थित कालिङ्गा स्टेडियममा जुलाई २५ मा हुने उद्घाटन खेलमा नेपालले माल्दिभ्सको सामना गर्नेछ ।

नेपालले दोस्रो खेलमा श्रीलंकासँग जुलाई २७ मा खेल्नेछ । त्यस्तै भारतसँग जुलाई ३१ र अन्तिम खेल बंगलादेशसँग अगस्ट २ मा खेल्नेछ । शीर्ष दुई टोलीले उपाधिका लागि अगस्ट ५ मा प्रतिस्पर्धा छ ।