एन्फाको कार्यसमिति बैठक : साफ च्याम्पियनसिप र एनएसएल मुख्य एजेन्डा

काठमाडौं । अखिल नेपाल फुटबल संघ (एन्फा) को कार्यसमिति बैठक आगामी साउन २ गते बस्ने भएको छ ।

एन्फाले सातदोबाटोस्थित एन्फा कम्प्लेक्समा साउन २ गतेका लागि कार्यसमिति बैठक बोलाएको हो ।

कार्यसमिति बैठकमा विभिन्न एजेन्डामा छलफल हुनेछ । तर, नेपालमा आयोजना हुने महिला साफ च्याम्पियनसिप र नेपाल सुपर लिग (एनएसएल) मुख्य एजेन्डाको रुपमा रहेको छ ।

'कार्यसमिति बैठक साउन २ गते बस्दैछ । मुख्य एजेन्डा महिला साफ र एनएसएल रहेको छ,' एन्फाका महासचिव राईले भने, 'यी लगायत अन्य एजेन्डाहरु पनि रहेको छ ।'

महिला साफ नेपालमा आयोजना हुँदैछ । च्याम्पियनसिप आगामी भदौ १३ देखि २५ सम्म आयोजना हुनेछ ।

तर, काठमाडौंमा आयोजना गर्ने की राजधानी बाहिर गर्ने भन्ने विषय टुंगो लागेको छैन । बैठकमा साफको भेन्युसहित आयोजक कमिटि गठनको विषयमा छलफल हुनेछ । 

यस्तै पछिल्लो समय ए डिभिजनका असन्तुष्ट ४ क्लब र फ्रेन्चाईज फुटबल एनएसएल विवाद टुंगिएको छैन ।

'ए' डिभिजन क्लबका ४ क्लब थ्री स्टार, मनाङ मर्स्याङ्दी, संकटा र न्युरोड टिम (एनआरटी) ले एनएसएलसँगको सम्झौता रद्दका लागि दबाब दिईरहेको छ ।

एन्फाले सम्झौता रद्दका लागि कार्यसमितिमा सिफारिस गर्ने निर्णय गरिसकेको छ  ।

अघिल्लो कार्यसमितिले एनएसएल आयोजक नेपाल स्पोर्टस म्यानेजमेन्ट एण्ड इभेन्ट कम्पनीलाई भदौ २५ देखि कात्तिक ५ गतेसम्म दोस्रो संस्करण आयोजनाको स्विकृती दिएको थियो ।

कार्यसमिति बैठकमा एन्फाको सिईओ र प्रवक्ता नियुक्तिको विषयमा समेत छलफल हुनेछ । त्यस्तै ए डिभिजन लिगको बारेमा समेत बैठकमा एजेन्डाको विषय बनाईएको छ।  

एन्फाको नव निर्वाचित कमिटिको यो दोस्रो कार्यसमिति बैठक हो । पहिलो बैठकले किरण राईलाई महासचिव र रवीन्द्र जोशीलाई कोषाध्यक्ष नियुक्त गरेको थियो । त्यस्तै अन्तराष्ट्रिय सम्बन्ध प्रमुखमा नविन पाँडेलाई नियुक्त गरेको थियो ।