एरिक्सनलाई क्लबमै राख्ने ब्रेन्टफोर्डको योजना  

काठमाडौं । इंग्लिस प्रिमियर लिग क्लब ब्रेन्टफोर्डले मिडफिल्डर क्रिस्टियन एरिक्सनलाई क्लबमै राख्ने योजना बनाएको छ ।

म्यानचेस्टर युनाईटेडले अनुबन्ध गर्ने चर्चा चलिरहेको बेला ब्रेन्टफोर्डले एरिक्सनलाई क्लबमै राख्न तयारी थालेको छ ।   

डेनमार्कका मिडफिल्डर एरिक्सनको ब्रेन्टफोर्डसँगको सम्झौता जुन अन्तिममा सकिदैछ ।

एरिक्सनले गत सिजन ब्रेन्टफोर्डसँग सिजनको अन्तिमसम्मका लागि सम्झौता गरेका थिए ।

गत सिजन उनले ब्रेन्टफोर्डका लागि ११ प्रिमियर लिग खेलेका थिए ।

३० वर्षीय एरिक्सन दुई वर्षपछि प्रिमियर लिग फर्किएका हुन् ।

एरिक्सन सन् २०२० मा टोटेनहमबाट इन्टर मिलान गएका थिए ।

तर, एरिक्सनले युरोकप दौरान भएको हृदयघातपछि ब्रेन्टफोर्डबाटै पुनरागमन गरेका हुन् ।

इटालियन क्लब इन्टरसँगको सम्झौता रद्द गरेपछि एरिक्सन इंग्लिस क्लब आएका हुन् ।

मुटुको गति नियन्त्रण गर्ने स्वचालित यन्त्र इम्प्लान्टेबल कार्डियोभर्टर डेफिब्रिलेटर (आइसिडी) नहटाएसम्म इटालीमा खेल्न नपाउने भएपछि एरिक्सन र इन्टरले सम्झौता रद्द गरेको हो ।

हृदयघात भएपछि डेनमार्कका मिडफिल्डर एरिक्सनको शरीरमा आइसिडी  जडान गरिएको छ ।

युरोकपमा फिनल्याण्डविरुद्धको खेल दौरान हृदयघात भएर एरिक्सन मैदानमा ढलेका थिए  ।