काठमाडौं । राष्ट्रिय खेलकुद परिषद (राखेप) का पुर्व उपाध्यक्ष पिताम्बर तिमल्सिना सहित तीन पदाधिकारी राखेपको बोर्ड सदस्यमा नियुक्त भएका छन् ।
आइतबार बसेको मन्त्रिपरिषद्को बैठकले रिक्त रहेको बोर्ड सदस्यमा तिमल्सिनासहित, नेपाल भलिबल संघका केन्द्रिय सदस्य इन्दिरा निरौला र पुर्व सदस्य राजेश गुरुङलाई नियुक्त गरेको हो ।
युवा तथा खेलकुद मन्त्री जगत बहादुर विश्वकर्माले रिक्त रहेको बोर्ड सदस्यका लागि तिमल्सिनासहित ३ पदाधिकारीको नाम सिफारिस गरेका थिए । जसलाई मन्त्रिपरिषद्को बैठकले पारित गरेको हो ।
नवनियुक्त सदस्य तिमल्सिनाले सरकारले आफुहरुलाई सदस्य नियुक्त गरेको मौखिक जानकारी आएको र नियुक्तिपत्र मंगलबार आउने जानकारी खेलपाटीलाई गराए ।
'मसहित तीन जनालाई सरकारले बोर्ड सदस्य नियुक्त गरेको छ,' तिमल्सिनाले भने, 'नियुक्त पत्र मंगलबार आउने छ । हाम्रो शपथ बुधबार हुने जानकारी आएको छ ।'
राखेप बोर्ड सदस्यमा नियुक्त भएका तिमल्सिना लामो समयबाट नेपाली खेलकुदमा सक्रिय रहेका छन् ।
यस्तै निरौला पुर्व राष्ट्रिय महिला भलिबल खेलाडी हुन् । हाल भलिबल संघको केन्द्रीय सदस्य समेत रहेकी छिन् ।
बक्सिङका पुर्व खेलाडी गुरुङ पुर्व राखेप सदस्य हुन् ।
