रुसी राष्ट्रपति पुटिनलाई पेलेको खुलापत्र

काठमाडौं । ब्राजिलका फुटबल लेजेन्ड पेलेले रूसी राष्ट्रपति भ्लादिमिर पुटिनलाई युक्रेनमा रुसी सेनाको आक्रमण अन्त्य गर्न अनुरोध गर्दै खुलापत्र लेखेका छन् ।

युद्धग्रस्त युक्रेनको राष्ट्रिय टोलीले २०२२ फिफा विश्वकपका लागि छनोट हुने आशा जीवितै राखेको अवस्थामा पेलेको पत्र सार्वजनिक भएको छ ।

'आज युक्रेनले कम्तिमा ९० मिनेटको लागि त्यो त्रास भुल्न खोजेको छ, जसले अझै पनि आफ्नो देशलाई घेरेको छ,'  युक्रेनी राष्ट्रिय फुटबल टोलीले विश्वकपको प्लेअफ सेमिफाइनलमा स्कटल्याण्डसँग खेल्नु अघि पेलेले इन्स्टाग्राममा पोस्ट गरेका छन् ।

युक्रेनले स्कटल्याण्डलाई ३-१ ले हराएको थियो । अब उसले बुधबार वेल्सको सामना गर्दै समूह 'बी' बाट अगाडी बढ्न चाहन्छ । समूह 'बी' मा  इङ्ल्यान्ड, अमेरिका र इरान रहेका छन् ।

'म आजको खेललाई अनुरोध गर्ने अवसरको रूपमा प्रयोग गर्न चाहन्छु: आक्रमण रोक्नुहोस् । यो निरन्तर हिंसाको कुनै औचित्य छैन,' तीन पटकको विश्वकप बिजेताले पुटिनलाई खुलापत्रमा लेखेका छन्, 'यो द्वन्द्व खराब छ, अव्यावहारिक छ र यसले पीडा, डर,आतंक बाहेक केही ल्याउँदैन । युद्धले केवल राष्ट्रहरू अलग मात्र गर्छ । त्यो राम्रो विचार हुनै सक्दैन जसले साना बच्चाहरूको सपना निमोठ्ने, परिवारलाई बर्बाद गर्ने र निर्दोषहरूलाई मार्ने क्षेप्यास्त्रहरूलाई अस्तित्त्व दिन्छ ।' 

पेलेले विगतमा पुटिनलाई भेटेको र हात मिलाएर लामो मुस्कान आदान प्रदान गरेको सम्झना गरे ।

'यो द्वन्द्व रोक्ने शक्ति तपाइँको हातमा छ। मैले मस्कोमा सन् २०१७ मा हाम्रो अन्तिम भेटमा भेटेको जस्तै तपाइँबाट मुस्कान चाहन्छु,' उनले लेखेका छन् ।

महान फुटबलरका रूपमा मानिने पेलेले १९७७ मा सन्यास लिनु अघि १ हजार भन्दा बढी गोल गरेर किर्तिमान कायम गरेका थिए ।

हाल उनी  अस्वस्थ छन् । गत सेप्टेम्बरमा पेलेको कोलोन ट्युमरको शल्यक्रिया गरिएको थियो । अहिले केमोथेरापी चलिरहेको छ ।

उनको सन्देश युक्रेन द्वन्द्वको १०० औं दिनको नजिक आइपुगेको छ ।  रुसी सेनाको कीभलाई कब्जा गर्ने प्रयास गर्न असफल भएपछि देशको पूर्वीक्षेत्रमा भयंकर लडाइँ भईरहेको छ ।