मत बदरको निर्णयविरुद्ध पुनरावेदनमा जाने

काठमाडौं । अखिल नेपाल फुटबल संघ (एन्फा)को आसन्न निर्वाचनमा चार मत अयोग्य हुने निर्वाचन समितिको निर्णयविरुद्ध सम्बद्ध क्लब, संघ र जिल्ला पुनरावेदनमा जाने भएका छन् ।

मतदाताको अन्तिम नामावली प्रकाशन गर्ने क्रममा एन्फाको निर्वाचन समितिले चार मत अयोग्य हुने निर्णय गरेको थियो । 

प्राप्त दाबी विरोधमाथि छानविन गर्दै निर्वाचन समितिले फ्रेन्ड्स क्लबका दिपक थापा, सरस्वती क्लबका उत्तम भण्डारी, सिराहा जिल्लाका प्रविण यादव र महिला संघकी पेमा डोल्मा लामाको मत बदर हुने निर्णय गरेको थियो । 

एन्फाका केन्द्रिय पदाधिकारी प्रतिनिधि बनेर आएको भन्दै सिराहा, एन्फाको स्थायी कमिटिमा रहेको भन्दै सरस्वती, कीर्ते कागजात बुझाएको भन्दै महिला संघ र निर्वाचन प्रक्रिया सुरु भैसकेको अवस्थामा राजीनामा दिएको भन्दै दिपक थापाको मताधिकार बदर गर्ने निर्णय भएको थियो ।

चार वटै मत एन्फाका वर्तमान अध्यक्ष कर्माछिरिङ शेर्पा पक्षको रहेका छन् ।

सरस्वती क्लबका महासचिव उत्तम भण्डारीले निर्वाचन समितिको निर्णयविरुद्ध आफुहरु पुनरावेदनमा जाने खेलपाटीलाई बताए । उनले पुनरावेदनमा जानका लागि आन्तरिक गृहकार्य भैरहेको उल्लेख गरेका छन् ।

‘निर्वाचन समितिको निर्णयले हामीलाई अन्याय भएको छ ।  समितिले आफु अनुकुलको ब्याख्या गरेको छ ।’ उनले भने । ‘त्यस्तो ब्याख्या किन, कहाँबाट प्रभावित बनेर गरियो भन्ने कुरा विषय हामी खोज्नेनै छौं ।’ भण्डारीले थपे ।

एन्फाको सामाजिक उत्तरदायित्व समितिमा बसेको भन्दै भण्डारी मताधिकार सहित सहभागी हुन नपाउने निर्वाचन समितिको ठहर छ । सरस्वती क्लबबाट शिक्षित पराजुली एन्फाको आसन्न निर्वाचनमा वरिष्ठ उपाध्यक्ष पदमा उम्मेदवारी दिएका छन् । निर्वाचन समितिको निर्णयमा चित्त नबुझेको खण्डमा पुनरावेदनमा जान सकिने ब्यवस्था रहेको छ । 

एन्फाको आसन्न निर्वाचनमा जिल्ला, क्लब र संघ गरि ८७ मत रहेका थिए । सिन्धुली र भक्तपुर निर्वाचनमा सहभागी हुन नपाउने भएपछि जम्मा मत संख्या ८५ मा घटेको थियो । चार मत बदर गर्दै निर्वाचन समितिले ८१ जनाको अन्तिम नामावली प्रकाशन गरेको छ ।

एन्फाका आसन्न निर्वाचनमा वर्तमान अध्यक्ष शेर्पा र वरिष्ठ उपाध्यक्ष पंकजबिक्रम नेम्वाङ प्यानल सहित चुनावी प्रतिस्पर्धामा छन् । 

यो पनि, एन्फा निर्वाचनको चार भोट बदर !