'हरेक माध्यमिक विद्यालयमा खेलकुद शिक्षक'

काठमाडौं । बागमती प्रदेश सरकारले हरेक माध्यमिक विद्यालयमा खेलकुद शिक्षक राख्ने गरि नीति तथा कार्यक्रम सार्वजनीक गरेको छ । 

नयाँ आर्थिक वर्षका लागि सरकारको नीति तथा कार्यक्रम सार्वजनीक गर्दै प्रदेश सरकारले हरेक माध्यमिक विद्यालयमा कार्यरत शिक्षक मध्य एक जनालाई प्रशिक्षण प्रदान गरेर खेलकुद शिक्षक तोक्ने व्यवस्था मिलाउने भएको हो । 

प्रदेश सभाको सोमबारको बैठकमा प्रदेश प्रमुख यादव चन्द्र शर्माले नयाँ आर्थिक वर्षको बागमती प्रदेश सरकारको नीति तथा कार्यक्रम प्रस्तुत गरेका थिए । 

यस्तै प्रदेश सरकारद्धारा प्रस्तुत नीति तथा कार्यक्रममा प्रदेश खेलकुद विकास र विस्तारका लागि प्रदेश खेलकुद परिषद् र स्थानीय तहसँग सहकार्य र समझदारीमा प्रदेश स्तरीय रंगशाला, कर्र्भडहल, फुटसल तथा खुल्ला व्यायामशाला लगायतका खेल पूर्वाधारको निर्माण र संरक्षणमा जोड दिईने उल्लेख गरिएको छ । 

यस्तै, नियमित रुपमा प्रदेश स्तरीय खेलकुद प्रतियोगिता आयोजना गर्ने प्रदेश सरकारको नीति तथा कार्यक्रममा राष्ट्रिय खेलकुद प्रतियोगितामा प्रदेशको तर्फबाट सहभागिताको लागि आवश्यक व्यवस्था गरिने उल्लेख छ । 

यस्तै, सरकारले खेलाडी, प्रशिक्षक तथा रेफ्रीलाई प्रशिक्षण, सम्मान र पुरस्कारको व्यवस्था मिलाउने नीति कार्यक्रममा उल्लेख गरिएको छ । 

देश संघीय संरचनामा गएपछि खेलकुदको कार्यक्रम र पूर्वाधार निर्माणमा बागमती प्रदेश खेलकुदले उत्कृष्ट कार्य गर्दै आएको छ । गत वर्षमात्र प्रदेश सरकारले पहिलो प्रदेश स्तरीय प्रतियोगिता आयोजना गरेर इतिहास रचेको थियो ।