क्यानविरुद्ध इपीएलको मुद्दामा कारण देखाऊ आदेश

काठमाडौं । सर्वोच्च अदालतले एभरेष्ट प्रिमियर लिग (इपीएल) आयोजक र सहभागी ६ टोलीले नेपाल क्रिकेट संघ (क्यान) विरुद्ध दर्ता गरेको मुद्दामा कारण देखाऊ आदेश दिएको छ ।

सर्वोच्चका न्यायाधीश विश्वम्भरप्रसाद श्रेष्ठले सोमबार मुद्दाको सुनुवाइ गर्दै कारण देखाऊ आदेश दिएका हुन् । यस्तै अदालतले छलफलका लागि बोलाईएको छ ।

इपीएलले गत जेठ १२ गते अन्तरिम आदेशको माग सहित मुद्दा दर्ता गरेको थियो ।  

क्यानले नेपाल टी-ट्वान्टी लिग बाहेक अन्य फ्रेन्चाइज टी-ट्वान्टी क्रिकेटलाई राष्ट्रिय मान्यता नदिने निर्णय गरेर आफुहरुको कानुनी र संवैधानिक अधिकारमा आक्रमण भएको भन्दै इपीएलले मुद्दा दर्ता गरेको थियो ।

गत हप्ताको मंगलबार बसेको क्यानको बोर्ड बैठकले नेपाल आयोजना हुने फ्रेन्चाइज टी-ट्वान्टी क्रिकेटलाई राष्ट्रिय मान्यता नदिने निर्णय गरेको थियो ।

क्यानले आफ्नो आधिकारिक फ्रेन्चाइज नेपाल टी-ट्वान्टी लिग गर्ने भएको कारण अन्य लिगलाई मान्यता नदिने जनाएको थियो । क्यानले लिगको मिति र लिग खेल्ने ६ वटा टिमको नाम समेत सार्वजनिक गरिसकेको छ । 

नेपालमा एभरेष्ट प्रिमियर लिग (इपीएल), पोखरा प्रिमियर लिग (पीपीएल) र धनगढी प्रिमियर लिग (डिपीएल) संचालन हुँदै आएको छ ।