रोनाल्डोले सिजनको अन्तिम खेल गुमाउने

एजेन्सी । क्रिस्टियानो रोनाल्डोले सिजनको अन्तिम लिग खेल गुमाउने भएका छन् । रिपोर्टका अनुसार रोनाल्डोले ‘हिप’मा देखिएको समस्याका कारण प्रिमियर लिगको यस सिजनको अन्तिम खेल गुमाउने भएका हुन् । 

रेड डेभिल्सले लिगको अन्तिम खेलमा घरेलु टोली क्रिस्टल प्यालेससँग खेल्दैछ । युनाईटेड अन्तिम खेलमा जित निकाल्दै वेस्ट ह्याम भन्दा माथि रहेर युरोपा लिगमा छनोट हुन चाहन्छ । 

तर स्टार फरवार्ड रोनाल्डो हिपमा देखिएको समस्याका कारण टिम बाहिर रहनेछन् । ३७ वर्षिया फरवार्डलाई धेरै साना समस्याका कारण यस सिजन दुख दियो । हिपमा देखिएको समस्याका कारणनै उनी गत जनवरी र मार्चमा दुई पटक खेल बाहिर रहे ।

अन्तिम खेल गुमाएपनि रोनाल्डो यस सिजन युनाईटेडका सर्वाधिक गोलकर्ता रहेका छन् । उनले प्रिमियर लिगका ३० खेलमा १८ गोल गरेका छन् । उनी ओल्डट्राफोर्ड फर्किएर पहिलो सिजन खेलेका हुन् । 

यस्तै यसै सिजन क्लब छाड्ने तयारीमा रहेका पाउल पोग्बा समेत अन्तिम खेलमा हुने छैनन् । गत अप्रिलमा लिभरपुलसँग ४–० ले पराजित बनेको खेलमा पोग्बाले चोट बोकेका थिए ।