ईपीएल, अन्तिम दिन अन्तिम पाँच प्रश्न

काठमाडौं । विश्व फुटबलको सर्वाधिक लोकप्रिय लिग इंग्लिग प्रिमियर लिग (ईपीएल) हो भने यो किन यस्तो छ भन्नेको उत्तर आज आइतबार पनि हेर्न पाइनेछ । लिगको अन्तिम दिन पुग्यो, अझै खास खास प्रश्नको उत्तर आएको छैन् । लिगको रोमाञ्चकता यही हो नि, होइन न र ? तीन महत्त्ववपूर्ण प्रश्न हुन्, लिग कसले जित्छ, म्यानचेस्टर सिटी कि लिभरपुल ? युरोपेली च्याम्पियन्स लिग खेल्ने चौथो टिम कुन हुनेछ, टोटनहम कि आर्सनल ।

अन्तिम रेलिगेसन पर्ने तेस्रो तथा अन्तिम टिम कुन हुनेछ, बर्नली कि लिड्स युनाइटेड ? दस वर्षपछि मात्र यस्तो संयोग जुड्दैछ, लिगको अन्तिम दिन मात्र शीर्ष चार र रेलिगेसनमा पर्ने टिमबाट अन्तिम निर्णय हुनेछ । लिग उपाधिको होडमा दुई छन्, तिनै सिटी र लिभरपुल । सिटीलाई शीर्ष स्थानमा एक अंकको अग्रता प्राप्त छ । धेरैलाई के विश्वास छ भने लिग जित्ने आखिरमा सिटीले नै हो, किन भने यो यति धेरै बलियो पनि छ । 

ठ्याक्कै भन्दा सिटीले एस्टन भिल्लाविरुद्धको अन्तिम खेल गुमाउने सम्भावना कमै छ । सिटीले आफ्नो अनुकुल नतिजा निकाल्न सकेन भने फाइदा हुने लिभरपुललाई नै हो । यस्तो भएमा अर्को अद्धितीय सम्भावना कायम रहन्छ, एकै सिजन चार ठूला उपाधि जित्ने सम्भावना । लिभरपुलले घरेलु दुई कप उपाधि, लिगकप र एफएकप जितिसकेको छ । अब पालो, घरेलु लिगको हो । त्यसपछि युरोपेली च्याम्पियन्स लिग त छँदैछ । लिभरपुललाई पनि थाहा छ, सिटी चिप्लिने सम्भावना कमै छ ।

चौथो स्थानमा को त ? यो होड हो, दुई उत्तरी लन्डन क्लबको । अहिले तत्काल टोटनहम ६८ अंकमा चौथो स्थानमा छ भने आर्सनल त्यसपछाडि ६६ अंकमा । केही दिन अगाडिसम्म पनि यो चौथो स्थान आर्सनलको हातमै थियो, तर टोटनहमविरुद्धको खेल गुमाएपछि त आर्सनलको स्थिति निकै नाजुक बनेको छ । आर्सनल आफैले भनिरहेको छ, सायद अहिलेको यो टिम अर्को सिजन युरोपेली च्याम्पियन्स लिग खेल्न योग्य नै छैन्, सायद यो मानसिक रूपमा आत्मसमर्पण नै हो ।

अन्तिम दिन आर्सनलले एभरटनविरुद्ध खेल्ने छ भने टोटेनहमको खेल नरविचविरुद्ध छ । यसमा पनि सायद टोटनहमको चौथो स्थानको सम्भावना बढी छ । र, रह्यो अर्को प्रश्न, रेलिगेसनमा अब को पर्नेछ ? बर्नली ३५ अंकमा १७ औं स्थानमा छ । लिड्स १८ औं स्थानमा छ र उसको पनि समान ३५ अंक छ । गोल अन्तरमा भने बर्नली अगाडि छ । अगाडि के भन्ने, दुवैको गोल अन्तर ऋनात्मक नै हो, खालि लिड्सले बढी गोल खाएको हो ।

सायद बर्नली केही बलियो स्थितिमा छ कि ? अब बर्नलीले न्युकासल युनाइटेड र लिड्सले ब्रेन्टफोर्डको सामना गर्नेछ । सायद चौथो प्रश्नमा धेरैको उत्सुकता हुन्न । चौथो प्रश्नका दुई पात्र हुन्, म्यानचेस्टर युनाइटेड र वेस्ट ह्याम युनाइटेड । म्यानचेस्टर ५८ अंकमा छैटौं स्थानमा छ भने वेस्ट ह्याम उसको पछाडि ५६ अंकमा छ । म्यानचेस्टरले क्रिस्टल प्यालेस र वेस्ट ह्यामले ब्राइटनको सामना गर्दैछ । जुन टिम छैटौंमा रहन्छ, उसले युरोपा लिग खेल्नेछ ।

सातौंमा रहनेले भने युरोपा कन्फ्रेन्स लिग खेल्नेछ । अब अन्तिम प्रश्न, यो भने व्यक्तिगत उपलब्धीमा केन्द्रित छ । यसका पनि दुई फरक भाग छन् । पहिलो, गोल्डेन बुट जित्ने खेलाडीबारे । यसका लागि लिभरपुलका मोहमद सलाह र टोटनहमका सन ह्वेङ मिन प्रतिस्पर्धामा छन् । सहलाले २२ र ह्वेङ मिनले २१ गोल गरेका छन् । दोस्रो भाग, गोल्डेन ग्लोब्सको । यो उपाधिका लागि दुई प्रत्यासी छन्, लिभरपुलका एलिसन र सिटीका एडरसन ।

सबै खेल आज राति ८:४५ मा हुनेछन् र अन्त्यमा सबै प्रश्नका उत्तर पनि हुनेछन् ।

–एजेन्सीहरूको सहयोगमा ।