चितवनका कप्तान पारस भन्छन्, 'अब रियल फाइनल खेल्छौं'

पोखरा । सर्वाधिक पुरस्कार राशीको नमस्ते पोखरा प्रिमियर लिग (पीपीएल) टी–ट्वान्टी क्रिकेटको फाइनलमा प्रवेश गरेपछि चितवन राइनोजका कप्तान पारस खड्काले फाइनलमा जितको लयलाई कायम राख्ने बताएका छन् । 

फाइनल प्रवेशको लागि भएको आइतबार भएको एलिमिनेटर (प्ले अफ) खेलमा हुलास काठमाडौं रोयल्सलाई ६ विकेटले हराएर चितवन उपाधि नजिक पुगेको हो ।

'सुरुवातमा दुई खेल हारेपछि हाम्रो लागि बाँकी सबै खेल फाइनल सरह थियो,' जितपछि कप्तान पारसले भने, 'अब रियल फाइनल खेल बाँकी छ । हामी यो जितको प्रदर्शनलाई कायम राख्ने छौं  ।'

अब चितवनले उपाधिका लागि घरेलु टोली पोखरा पल्टनसंग मंगलबार खेल्नेछ । पोखरा लिग चरणमा शीर्ष स्थानमा रहदै फाइनल पुगिसकेको छ ।

कप्तान पारसले अब टिमको लक्ष्य उपाधि जित्ने रहेको बताए । कप्तान पारसले भने, 'अब एक राम्रो खेल खेल्नेछौ । जसले  हामीलाई उपाधि हात पार्नेछ ।'

यस्तै कप्तान पारस खड्काले सन्नी पटेलको प्रदर्शनले टिमको जित सहज भएको बताए ।

'विकेट सहज थिएन तर पहिलो इनिङसमा सन्नीको प्रदर्शन र विकेटले हामीलाई सहज भयो । त्यसपछि खेलको नतिजा अर्कै भयो,' कप्तान पारसले थपे ।

म्यान अफ दि म्याच बनेका सन्नीले एकै ओभरमा तीन विकेट लिएका थिए ।