पोखरा । युवा तथा खेलकुद मन्त्री महेश्वरजंग गहतराजले नवौं राष्ट्रिय खेलकुद निर्धारित मितिमा नै आयोजना हुने बताएका छन् ।
बिहीबार पोखरामा आयोजित पत्रकार सम्मेलनमा बोल्दै मन्त्री गहतराजले जेठ २२ देखि २८ गते सम्म गण्डकी प्रदेशमा प्रतियोगिता आयोजना हुने बताए ।
उनले नवौं राष्ट्रिय खेलकुद प्रतियोगिताको तयारीमा जुटन समेत खेल पदाधिकारीहरुलाई आग्रह गरे । उनले उपाधि जित्ने लक्ष्यसहित तयारी थाल्न पनि सवै प्रदेशका खेलाडीहरुलाई आग्रह गरे ।
नवौं राष्ट्रिय खेलकुदबाट नै एसिएन गेमकालागि खेलाडीहरु छनोट गर्नुपर्ने भएकाले पनि निर्धारित समयमै प्रतियोगिता आयोजना गर्नुको विकल्प नरहेको उनले बताए । खेलकुदको विकास जुन स्तरमा हुनुपर्ने हो त्यसो हुन नसकेको उल्लेख उनले आर्थिक, प्राविधिक र नीतिगत रुपमा मन्त्रालयले सपोर्ट गर्ने बताए ।
राष्ट्रिय खेलकुद परिषद् (राखेप) का सदस्य सचिव टंकलाल घिसिङले प्रतियोगितामा सात वटै प्रदेश, विभागीय टिम र गौर आवासीय नेपाली संघ (एनआरएन) गरी ७ हजार खेलाडी र ३ हजार अफिसियलहरु गरी १० हजारको सहभागिता रहने बताए । ११ जिल्लामा ३६ खेल आयोजना हुने उनले बताए । दशौं राष्ट्रिय खेलकुदका लागि कर्णाली प्रदेशलाई झण्डा हस्तान्तरण गरिने पनि सदस्य सचिव घिसिङले बताए ।
युवा तथा खेलकुद मन्त्रालयका सचिव डा. दामोदर रेग्मीले मन्त्रालयले आवश्यक बजेट प्रस्ताव गरिसकेको र अर्थमन्त्रालयबाट छिटै नै पारित हुने उनले बताए । उनले प्रदेश र स्थानीय तहबाट पनि आर्थिक सहयोग भए प्रतियोगिता व्यवस्थित गर्न थप मद्दत पुग्ने उल्लेख गरे । गण्डकी प्रदेशका सांसद मोहन रेग्मीले नवौं खेलकुद गण्डकी प्रदेशमा आयोजना गर्न पाउँदा समग्र प्रदेशवासी नै गौैरवान्वित भएको बताए ।
खेलकुद परिषद् गण्डकीका सदस्य सचिव तेजबहादुर गुरुङले खेलकुदमा कम लगानी भएकाले प्रतिफल राम्रो हुन नसकेको भन्दै बजेट विनियोजन गर्दा सरकारले खेलकुदलाई प्राथमिकतामा राख्नुपर्ने बताए । खेलकुदमा आफ्नो समग्र जीवन व्यतित गरेका खेलाडीहरुको अवस्था गर्व गर्न लायक नभएको बताउँदै गुरुङले खेलकुदलाई कसरी हेर्ने भन्ने विषयपनि नवौं राष्ट्रिय खेलकुदले स्पष्ट पार्नुपर्नेमा उनले जोड दिए ।
नेपाल भूतपूर्व खेलाडी मञ्चका अध्यक्ष हरीप्रसाद पराजुलीले मञ्चकोतर्फबाट खेलकुद सम्पन्न गर्न सक्दो सहयोग गर्ने प्रतिवद्धता व्यक्त गरे । कार्यक्रममा खेलाडीहरुले राष्ट्रको लागि आफूहरु लामो समय सम्म खेलेपनि राज्यस्तरबाट कुनैपनि सहयोग र सम्मान नपाएको भन्दै गुनासो गरेका थिए ।
-1751696964.webp)
