एसियन गेम्सको प्रचार गर्न आर्ट फेस्टिबल

काठमाडौं । नेपाल ओलम्पिक कमिटीले चीनको हाङचोउमा आयोजना हुने १९ औं एसियाली खेलकुदको प्रचार प्रसारका लागि आर्ट फेस्टिबलको आयोजना गरेको छ ।

कमिटीले बिहीबार आयोजना गरेको आर्ट फेस्टिबलमा ६२ विद्यार्थीको सहभागिता रहेको थियो । विश्व खेलकुदका कुनै ठूलो महोत्सव अगाडि विद्यार्थी सम्मिलित यस्तो महोत्सव आयोजना गर्ने परम्परा छ ।

फेस्टिबलमा १७ स्कुलका विद्यार्थीको सहभागिता रहेको हो र यी सबैलाई यहि आउने मंगलवार बैशाख २० गते प्रदर्शनमा राखिनेछ । यसमा सहभागी हुनेमध्येबाट ब्वाइजतर्फ ५ र गर्ल्सतर्फ ५ उत्कृष्ट चयन गरिनेछ । यसलाई ओलम्पिक काउन्सिल अफ एसियामा पठाइने छ र उसले थप छनोट गर्दै हाङचोउमा हुने प्रदर्शनमा राखिनेछ ।

नेपाल ओलम्पिक कमिटीका अध्यक्ष जीवनराम श्रेष्ठले महोत्सवको उद्घाटन गर्दै प्रतीकात्मक रूपमा चित्र कोरेका थिए । उनले चित्रकला र खेलकुदबीच नजिकको सम्बन्ध रहेको बताए ।

यस्तै कराँतेका मन्देकाजी श्रेष्ठ र टेबल टेनिसका मुना बासुकलाले आफूले कारेको चित्र प्रस्तुत गरिएको थियो । त्यसै क्रममा उनीहरुले आफ्नो खेल खेल जीवनको अनुभवबारे पनि बताए ।

कमिटीका वरिष्ठ उपाध्यक्ष तथा कार्यकारी निर्देशक चतुरानन्द राजबैद्यले चित्रकलाको माध्यमबाट नेपाली खेलकुदबारे नयाँ पुस्तामा जानकारी दिन पाएको खुसी व्यक्त गरे ।