काठमाडौं । नेपालको मछिन्द्र फुटबल क्लब एएफसी कप छनोट-२०२२ अन्तर्गत प्ले अफको पहिलो खेलमै पराजित भएको छ ।
त्रिपुरेश्वरस्थित दशरथ रंगशाला मंगलबार भएको खेलमा मछिन्द्र श्रीलंकाको ब्लु स्टारसँग २-१ गोल अन्तरले पराजित भएको हो । हारसँगै मछिन्द्र पहिलो खेलबाटै बाहिरिएको छ ।
मछिन्द्रलाई घरेलु मैदानमा स्तब्ध बनाउने क्रममा ब्लु स्टारका मोहमद इशान र सेनल सन्देशले एक एक गोल गरे ।
मछिन्द्रका कप्तान सुजल श्रेष्ठले एक गोल फर्काए ।
ब्लु स्टारले मछिन्द्रविरुद्ध तीन मिनेट भित्र दुई गोल गर्दै जित निकालेको हो ।
खेलको २५ औं मिनेटमा मोहमद इशानले गोल गर्दै ब्लु स्टारलाई सुरुआती अग्रता दिलाएका थिए ।
मोहमद फसलको क्विक फ्रि-किक पासमा इशानले सहजै गोल गरे।
त्यसपछि २८ औं मिनेटमा सेनल सन्देशले गोल गर्दै ब्लु स्टारलाई २-० को जित दिलाए । मछिन्द्रका रञ्जित धिमालले क्लियर गर्न नसकेको बलमा सन्देशले उत्कृष्ट गोल गरे ।
खेलको इन्जुरी समयमा कप्तान सुजलले हेडरमार्फत गोल गरेपनि मछिन्द्र २-१ ले स्तब्ध भयो । उनले मनिष डाँगी क्रसमा गोल गरे । तर उनको गोल सान्त्वना गोल बन्यो ।
पहिलो हाफमा दुई गोल व्यहोरेपनि खेलमा मछिन्द्रले पकड जमाएको थियो । तर, गोल भने गर्न सकेन ।
नवौं मिनेटमा मछिन्द्रका नुर्लानको प्रहार पोस्ट नजिकैबाट बाहिरिएको थियो ।
खेलको १६ औं मिनेटमा ब्लु स्टारले पेनाल्टीमा गोल गर्ने अवसर गुमायो । उसका अरीपाडे ओम्बिबीको पेनाल्टी मछिन्द्रका गोलकिपर विशाल श्रेष्ठले उत्कृष्ट बचाउ गरे ।
मछिन्द्रका देवेन्द्र तामाङले शेनल सन्देशलाई पेनाल्टी क्षेत्रमा लडाएपछि ब्लु स्टारले पेनाल्टीको अवसर पाएको थियो ।
खेलको १८ औं मिनेटमा रंजित धिमालको कर्नरमा मछिन्द्रका देवेन्द्रको हेडर बाहिरिएको थियो ।
३७ औं मिनेटमा मछिन्द्रका देवेन्द्र तामाङको उत्कृष्ट प्रहार बेलु स्टारका गोलकिपर फेर्नान्डोले उत्कृष्ट बचाऊ गरे ।
खेलको ४९ औं मिनेटमा मछिन्द्रका सुनिल बलको फ्रि-किक ब्लु स्टारका गोलकिपर फेर्नान्डोले मुश्किलले जोगाए ।
५१ औं मिनेटमा ब्लु स्टारका प्रिन्स बोडुको प्रहार मछिन्द्रका गोलकिपर विशालले उत्कृष्ट बचाउ गरे ।
खेलको ६० औं मिनेटमा मछिन्द्रका करिमको हेडर पोस्टमा लागेर फर्किएको थियो ।
६४ औं मिनेटमा मछिन्द्रका विमलको प्रहार ब्लु स्टारका गोलकिपरले सहजै बचाए ।
खेलको ६८ औं मिनेटमा मछिन्द्रले गोलको अवसर गुमायो । अविशेक रिजालको क्रसमा विमलको हेडर पोस्टमा लागेर फर्किएको थियो। त्यहिँ रिबाउन्ड बलमा छिरिङ गुरुङको प्रहार ब्लु क्रसका कप्तान थरिन्दु इरान्गाले गोललाइनबाट क्लियर गरे ।
यस्तै ७७ औं मिनेटमा मछिन्द्रका रञ्जित धिमालको क्रसमा अनमार्क रहेका कप्तान सुजल श्रेष्ठको हेडर बाहिरएको थियो ।
अब ब्लु स्टारले दोस्रो चरणमा भारतको मोहन बगानसँग खेल्नेछ । उक्त खेल अप्रिल १२ मा हुनेछ ।
