इटहरी । अफ्रिकन खेलाडी फोडे फोफाना र अजयी मार्टिन्सले गोल गरेपछि रोलिङ क्लब धुलाबारीले १२ औं संस्करणको इटहरी गोल्डकपमा विजयी सुरुआत गरेको छ ।
इटहरी रंगशालामा भएको तेश्रो क्वाटरफाइनलमा रोलिङले पाहुना टोली एभेनिर फुटबल क्ल्ब क्यामरुनलाई २-१ गोल अन्तरले हराउँदै सेमिफाइनलमा स्थान बनाएको हो ।
रोलिङको जितमा फोफाना र मार्टिन्सले गोल गरेका थिए । एभेनिरका केनीले सान्त्वना गोल फर्काए ।
खेलमा सुरुआती अग्रता एभेनिरले लिएको थियो । २७ औं मिनेटमा रोलिङका गोलरक्षक मनोज प्रधानको हातबाट फुत्किएको बललाई केनीले जाली चुमाए ।
त्यसको १ मिनेट नबित्दै फोफानाले गोल गर्दै खेल बराबरीमा ल्याए । त्यसपछि खेलको इन्जुरी समयमा मार्टिन्सले गोल गर्दै रोलिङलाई २-१ को जित दिलाए । एभेनिरका डिफेन्डर बेलको कमजोरीको फाइदा उठाउँदै मार्टिन्सले पोष्टको दिशा दिए ।
त्यसबाहेक खेलमा दुवै टिमले केही राम्रा मुभहरु बनाएपनि सदुपयोग गर्न सकेनन् । ९ औं मिनेटमा फोफानाको सशक्त हेडरलाई गोलरक्षक रोड्रिग्यूले नियन्त्रणमा लिए । २६ औं मिनेटमा एभेनिरका गोलरक्षक हातबाट फुत्किएको बललाई सन्जोग राईले खाली पोष्टमा गोल गर्न सकेनन् ।
३० औं मिनेटमा रोलिङका मार्टिन्सको एक्रोबेटिक प्रहार बाहिरियो । ६० औं मिनेटमा मनिष थापाको क्रसमा सन्जोगले गरेको हेडरले जाली चुम्न सकेन् । ६३ औं मिनेटमा रोलिङका गोलरक्षक मनोजलाई फाउल गरेपछि बोरिसले पहेलो कार्डको दर्शन गरे ।
७० औं मिनेटमा वान भर्सेस वानको अवस्थामा बोरिस अग्रता दिलाउनबाट चुके । खेलको म्यान अफ दि म्याच रोलिङका डिफेन्डर पिटर सेगुन घोषित भए । उनले नगद १० हजार प्राप्त गरे ।
जितसंगै रोलिङले फाइनल प्रवेशका लागि बुधबार विभागीय टोली त्रिभुवन आर्मीलाई प्रतिद्धन्द्धी पाएको छ ।
खेलपछि पत्रकारहरुसंग कुरा गर्दै एभेनिरका प्रशिक्षक आशिक थापा मगरले डिफेन्डरको कमजोरीको कारण पराजित भएको बताए । उनले खेल मैदान नबुझेको कारण खेलाडीहरुको फिनिसिङ आउन नसकेको बताए ।
मगरले क्यामरुनका खेलाडीहरुलाई घाँसे मैदानको अनुभव कम भएकाले अपेक्षा अनुरुप नभएको बताए । उनले खेलाडीहरु अनुशासित नभएकाले नेपालमा खेलिएका धेरै जसो प्रतियोगितामा पराजय भोगेको भन्ने गैर जिम्मेवारपुर्ण जवाफ दिए । उनले आफ्ना खेलाडीहरु रातभरी मोवाइलमा व्यस्त भइदिएको गुनासो गरे ।
‘रातभरी मोवाइलमा हुन्छन् यहाँ रातको ११ बज्दा उनीहरुको विहान हुन्छ अब परिवारसंग कुरा नगर भन्न पनि मिलेन्,’ उनले भने ।
उता रोलिङका प्रशिक्षक सुजन गुरुङले विपक्षी टिम राम्रो भएको बताए । उनले ग्राउन्डको कारणले पहिलो गोल व्यहोरेको बताए । मिडफिल्डमा कमजोरी भएको बताउँदै एरिया कभर नभएको बताए । खेपका कारण खेलाडीहरुले लगातार खेल भएकाले थाकेको उनले बताए । उनले लगातार खेलका कारण इन्जुरीको समस्या देखिएको बताए ।
उनले खेलाडीहरुलाई सम्झौता गरेर नराखेको कारण लगातार प्रतियोगिता खेलाउनुपर्ने बाध्यता रहेको सुनाए । उपलब्ध खेलाडी समेटेर टिम तयार भएको गुरुङले बताए ।
प्रतियोगिताको अन्तिम क्वाटरफाइनल खेलमा न्युरोड टिम (एनआरटी) र सगरमाथा युथ क्लब मोरङ बिच प्रतिस्पर्धा हुँदैछ । प्रतियोगितामा यसअघि विभागीय टोली त्रिभुवन आर्मी, मनाङ मर्स्याङ्दीले सेमिफाइनलमा स्थान सुरक्षित गरिसकेका छन् ।
