मछिन्द्र र ब्लु स्टारबीचको खेलको तयारी पूरा

काठमाडौं । एएफसी कप छनोट-२०२२ को प्ले अफ अन्तर्गत मछिन्द्र फुटबल क्लब र श्रीलंकन क्लब ब्लु स्टारबीचको खेलको सम्पूर्ण तयारी पूरा भएको छ ।

'ए' डिभिजन लिग च्याम्पियन मछिन्द्र एफसीले शनिबार पत्रकार सम्मेलन गर्दै खेलको सम्पूर्ण तयारी पूरा भएको जनाएको छ ।

मछिन्द्रले मंगलबार ब्लु स्टारसँग प्रतिस्पर्धा गर्नेछ । मछिन्द्र र ब्लु स्टारबीचको खेल दशरथ रंगशालामा हुनेछ।

मछिन्द्रले खेलको टिकट दर १ हजार र ५ सय राखेको छ ।

भीआईपीतर्फ १ हजार र सामान्यतर्फ ५ सयको टिकट दर राखिएको छ ।

खेल अघि सबिन राईको कन्सर्ट हुनेछ ।

मछिन्द्रसँगको खेलका लागि ब्लु स्टार नेपाल आईसकेका छन् ।

यस खेलको विजेताले दोस्रो चरणमा भारतको मोहन बगानसँग खेल्नेछ । जुन खेल अप्रिल १२ मा हुनेछ ।

मछिन्द्रले पहिलो पटक एएफसी कप छनोट खेल्न लागेको हो ।  अघिल्लो पटक क्लब लाइसेन्स नभएको कारण मछिन्द्रले छनोटको मौका गुमाएको थियो ।

यस पटक भने मछिन्द्रले क्लब लाइसेन्स प्राप्त गरिसकेको छ । मछिन्द्रसहित मनाङ, त्रिभुवन आर्मी र एपीएफले क्लब लाइसेन्स पाएको छ ।