काठमाडौं । घरेलु मैदानमा बिहीबार नेपालले टी-ट्वान्टी अन्तर्राष्ट्रिय क्रिकेटमा ५० खेलको कोशेढुंगा पूरा गर्यो ।
त्रिकोणात्मक सिरिज अन्तर्गत पपुवा न्युगिनी (पीएनजी) विरुद्धको खेलसँगै नेपालले ५० खेल पूरा गरेको हो । जुन खेलमा नेपालले ३७ रनको जित हात पार्यो ।
नेपालको ५० औं टी-ट्वान्टी अन्तर्राष्ट्रिय खेलमा अलराउण्डर करण केसीको ५० विकेट र एकै खेलमा ह्याट्रिकसहित ५ विकेट समेत पूरा भयो ।
नेपालले खेलमा ब्याटिङ तथा बलिङ दुवैमा खुलेर प्रदर्शन गर्यो । २ सय ४ रनको लक्ष्य प्रस्तुत गरेको नेपालले टी-ट्वान्टी अन्तर्राष्ट्रियमा छैठौं पटक २ सय रनको आंकडा पार गर्यो । नेपालले घरेलु भूमिमा नेपालले पाँचौं पटक टी-ट्वान्टी अन्तर्राष्ट्रियमा २ सय रन पार गरेको हो ।
टस जितेर पीएनजीले नेपाललाई पहिले ब्याटिङको निम्तो दिएपछि नेपालले मध्यम सुरुवात गर्यो । १३ ओभरसम्म नेपालले २ विकेट गुमाएर १ सय ६ रन बनाएको थियो ।
१४ औं ओभरमा रोहित पौडेलले चार्ल्स अमिनीलाई २ चौका र १ छक्का प्रहार गर्दा नेपाल ठुलो स्कोरतर्फ बढ्ने छनक देखिएको थियो । तर अर्को ओभरमा रोहितलाई रिले हेकुरेले आउट गरेपछि नेपाल केहि ओभर सुस्तायो । १५, १६ र १७ ओभरमा नेपालले विनाकुनै बाउन्ड्री २१ रन जोड्यो ।
१८ औं ओभरमा नेपाललाई दिपेन्द्रले गियर सिफ्ट गरे । नोरमान भानुअलाई खेलमा ३७ रन बनाएर सेट भएका दिपेन्द्रले लगातार ३ छक्का प्रहार गर्दै आफ्नो चौथो टी-ट्वान्टी अन्तर्राष्ट्रिय अर्धशतक पूरा गरे । सो ओभरको अन्तिम बलमा दिपेन्द्रले चौका प्रहार गर्दै नेपालको खातामा २४ रन बनाए । दिपेन्द्रले दबाएको एक्सेलेरेसनलाई लगत्तै १९ औं ओभरमा डेब्यु खेलाडी आदील अन्सारीले समेत साथ दिए ।
नोसाइना पोकानाको ओभरमा आदीलले पहिलो बलबाटै आक्रमण सुरु गरे । उनले पहिलो बलमा चौका प्रहार गरे । क्रमश: आदीलले पोकानाको बलमा लगातार ३ छक्का प्रहार गरे । ओभरको दोस्रो बलमा मिड अन क्षेत्रमा आदीलले प्रहार गरेको शक्तिशाली प्रहारमा बल दर्शकदीर्घा बाहिरबाट गयो । लगत्तैको तेस्रो बलमा आदीलले 'वाइड आउटसाइड अप स्टम्प'मा रहेको बललाई विश्वस्तरीय सट प्रहार गर्दै कभर क्षेत्रबाट मैदान बाहिर पुर्याइदिए, उक्त बल नोबल समेत रह्यो ।
'फ्री हिट' मा आदीलले लङ अनमा हेलिकप्टर सट प्रहार गर्दै छक्का प्रहार गरे । चौथो बल समेत हावामा खेल्दा आदीलको क्याच छुट्यो र ३ रन बटुल्न सफल भए । पाँचौ बलमा दिपेन्द्रले बललाई 'थर्डम्यान' माथिबाट ६ रन प्राप्त गरे । नेपालले १९ औं ओभरको ५ बलमा ३२ रन जोड्न सफल भयो । अन्तिम बलमा समेत लामो प्रहार गर्न खोज्दा आउट हुन पुगे ।
नेपालले एकै ओभरमा ३२ रन प्रहार गर्दा टी-ट्वान्टी अन्तर्राष्ट्रिय क्रिकेटमा एकै ओभरमा सर्वाधिक रन बनाउने विश्व कीर्तिमानमा ४ कीर्तिमानसँग तेस्रो स्थानमा बराबरी गरे । नेपालले मात्र २ ओभरमा ५६ रन जोड्यो । अन्तिम ओभरमा भने नेपालले सोचे अनुरुप रन बनाउन सकेन ।
२० औं ओभरमा ४ रन जोड्न नेपालले ३ विकेट गुमायो । ब्याटिङमा सनसनीपूर्ण ब्याटिङ गरेको नेपालले बलिङमा समेत उत्कृष्ट प्रदर्शन गर्यो ।
बलिङमा करण केसी नायक रहे । पीएनजीको सुरुवाती विकेट लिंदै करणले टी-ट्वान्टी अन्तर्राष्ट्रिय क्रिकेटमा कीर्तिमान बनाए । उनले टी-ट्वान्टी अन्तर्राष्ट्रिय क्रिकेटमा ५० विकेट पूरा गर्दै नेपालको लागि टी-ट्वान्टी अन्तर्राष्ट्रिय क्रिकेटमा ५० विकेट पूरा गर्ने दोस्रो खेलाडी बने ।
सन्दीपपछि टी-ट्वान्टी अन्तर्राष्ट्रिय क्रिकेटमा ५० विकेट लिने करण पहिलो र एकल खेलाडी हुन् । करण नेपालको ५० औं टी-ट्वान्टी अन्तर्राष्ट्रिय क्रिकेटमा खेलमा आफ्नो ५० विकेट मात्र पूरा गरेनन् । उनले टी-ट्वान्टी अन्तर्राष्ट्रिय क्रिकेटमा ह्याट्रिक पूरा गर्दै ५ विकेट लिन सफल भए । करणले अन्तिम ओभरको दोस्रो बलमा चाड सोपर, तेस्रो बलमा सिमोन अटाई र चौथो बलमा पोकानालाई आउट गर्दै टी-ट्वान्टी अन्तर्राष्ट्रिय क्रिकेटमा ह्याट्रिक गर्ने नेपालको पहिलो खेलाडी बने ।
अन्तिम बलमा विकेट निकाल्न करण लगायत सबैले फिल्डिङमा ध्यान दिएका थिए । स्लोअर बल फाल्दा पोकानाको ब्याटबाट हावामा उँडेको बल दिपेन्द्रको माथि पुग्यो । बल क्याच हुनु भन्दा पहिलेनै करणले सेलिब्रेट गरे ।
'दुई विकेट लिएपछि फिल्डिङमा ध्यान दिएका थियौं । फास्ट फाल्दा ब्याटरले बल रोक्छ भन्ने लाग्यो र स्लोअर फाल्ने निर्णय गरे । जे होस, अत्ताएर भएपनि आउट गर्नु पर्छ भन्ने लागेको थियो । फिल्डर दिपेन्द्र भएको कारण क्याच हुन भन्दा पहिले नै रमाएको थिएँ । अरु भएको भए हेर्न हुन्थ्यो तर दिपेन्द्र भएर सेलिब्रेट गरिसकेको थिएँ । मेरो अन्तर्राष्ट्रिय करिअर यो बेस्ट बलिङ फिगर हो । खुसी लागि रहेको छ मेरो लागि स्पेसल नै हो । आगामी दिनमा अझै ४/५ वटा प्रयास गर्छु' खेलपछि करणले भने, 'हामी ४/५ वर्ष देखि टी-ट्वान्टी मात्र खेल्दै आएका छौं । हाम्रो घरेलु प्रतियोगिता पनि टी-ट्वान्टी ढाँचामा छ । त्यही हिसाबले अभ्यास भएको हुन्छ, खेल खेल्दा अटोमेटिक टी-ट्वान्टीको मुड आउँछ । बलिङमा भेरियसन, सुरुवातमा कस्तो बल गर्ने, त्यो सबै अनुभबले गर्दा अन्तर्राष्ट्रियमा फाइदा भयो ।'
खेलमा पहिलो २ र अन्तिम ३ विकेट लिएका करण प्लेयर अफ द म्याच बने । यसअघि करणले सिरिजको पहिलो खेलमा पीएनजीको अन्तिम २ विकेट लिँदै अलआउट गरेका थिए । अर्को खेलमा करणले मलेसियाविरुद्ध खेलको पहिलो बलमा विकेट लिँदै ३ बलमा ३ विकेट लिएका थिए तर त्यसलाई ह्याट्रिक भने मानिदैन ।
करण ६ पटक टी-ट्वान्टी अन्तर्राष्ट्रियमा प्लेयर अफ द म्याच घोषित हुने पहिलो नेपाली खेलाडी हुन् । यस्तै करणको २१ रन खर्चेर ५ विकेट लिएको बलिङ फिगर नेपाली बलर मध्यको उत्कृष्ट बलिङ फिगर हो ।
नेपालले त्रिकोणात्मक सिरिजमा ३ खेलमा ३ जित निकाल्दै फाइनल प्रवेश गरेको छ । पहिलो खेलमा पीएनजीलाई १५ रनले पराजित गरेको नेपाल दोस्रो खेलमा मलेसियालाई ६ विकेट तथा बिहीबार पुन: पीएनजीलाई ३७ रनले पराजित गर्दा नेपाल एक खेल अगावै फाइनल पुगेको हो ।
-1751597995.webp)
-1751593454.webp)
