सबैले राम्रो गरे - सन्दीप

काठमाडौं । नेपाली राष्ट्रिय क्रिकेट टोलीका कप्तान सन्दीप लामिछानेले सबै खेलाडीले राम्रो प्रदर्शन गरेको कारण पपुवा न्युगिनी (पीएनजी) विरुद्ध जित सम्भव भएको बताएका छन् ।

त्रिवि क्रिकेट मैदानमा बिहीबार नेपालले पीएनजीलाई ३७ रनले हराएको हो । यस जितसँगै नेपाल एक खेल अगाबै सिरिजको फाइनलमा पुगेको छ ।

'ग्रेट एफोर्ड, सबैले राम्रो गरे । बिचमा डगमगाएको थियो । दिपेन्द्र र आदीलले सम्हाले ।,' खेलपछि सन्दीपले भने, 'निरन्तर विकेट पायौं । करणको ५ विकेट र ह्याट्रिक ठुलो उपलब्धि हो । सबैको प्रयास सराहनीय छ ।'

कप्तान सन्दीपले सबैकुरा विस्तारै राम्रो हुँदै गईरहेको समेत बताए । उनले आसिफ शेखले दबाबमा राखेर खेलिरहेको र डेब्यु खेलाडी आदील अन्सारीले आत्मविश्वासका साथ खेलेको बताए ।