काठमाडौं । नेपालको कसिलो बलिङ र आसिफ शेखको अर्धशतकीय इनिङमा नेपालले त्रिकोणात्मक टी-ट्वान्टी सिरिजमा मलेसियालाई सहजै पराजित गर्यो ।
कीर्तिपुरस्थित त्रिवि क्रिकेट मैदानमा बुधबार १ सय १५ रनको लक्ष्य पछ्याएको नेपालले मात्र १३ ओभर ४ बलमा मात्र ४ विकेट गुमाएर पूरा गर्यो ।
नेपालको जितमा आसिफ नायक बने । उनले ३८ बलमा ७ चौका र १ छक्का प्रहार गर्दै ५७ रनको अर्धशतकीय इनिङ खेलेपछि नेपालले सहज जित निकाल्न सफल भएको थियो ।
खराब सुरुवात गरेको नेपालले खेलको दोस्रो ओभरमा मात्र १ रन जोड्दा ओपनर कुशल भुर्तेललाई गुमाउन पुगेको थियो । चौंथो ओभरसम्म जम्मा २५ रन जोड्दा नेपालले रोहित पौडेललाई १२ रनमा गुमाएपछि नेपाल खेलमा पछि परेको थियो ।
तर, आसिफ र दिपेन्द्र सिंह ऐरीले तेस्रो विकेटको लागि ८ ओभर २ बलमा ७० रनको साझेदारी गरेपछि नेपालको जितको आधार तयार भएको थियो । आसिफले ३१ बल खेल्दै ६ चौका र १ छक्काको मद्दतमा अर्धशतक पूरा गरे । टी-ट्वान्टी अन्तर्राष्ट्रियमा आफ्नो व्यक्तिगत सर्वाधिक रन बनाएका आसिफ सेइद अजिजको बलमा थर्ड म्यानमा रहेका आइनोल हफिजको हातबाट सहज क्याच भए ।
टी-ट्वान्टी अन्तर्राष्ट्रियमा दोस्रो अर्धशतक बनाएका आसिफ खेलको म्यान अफ द म्याच घोषित समेत भए । नेपाललाई जिताउन मुख्य भूमिका खेलेका आसिफले यद्दपी खेलमा अविजित रहँदै खेल जिताउन सकेनन् ।
नेपाली खेलाडीहरुले पछिल्लो खेलहरुमा ठुलो इनिङ खेलेपनि अविजित रहदै पेभेलियन फर्किन सकेका छैनन् । त्यसले नेपाल बलियो स्थितिबाट समेत पराजित भएको थुप्रै उदाहरण छन् ।
कप्तान सन्दीप लामिछानेले समेत आसिफको इनिङको तारिफ गर्दै खेलमा अविजित फर्किएको भए सुनमा सुगन्ध हुने बताए ।
'म्यानेजमेन्टले चाहेको जस्तै इनिङ आसिफले दिए । तर पनि मलाई लाग्छ उनले खेल सकेर फर्किनु पर्ने थियो । उनले खेल सकेर फर्किएको भए सुनमा सुगन्ध जस्तै हुन्थ्यो ।' खेलपछि सन्दीपले भने, 'मलाई विश्वास छ कि आसिफले यहाँबाट सिक्ने छन् किनकि यस्तो अवसर निकै थोरै आउने छ । मलाई विश्वास छ उनले यो जानीजानी गरेका छैनन् ।आसिफ अहिले लयमा फर्किएका छन् र म उनले स्वतन्त्र रुपमा खेलेको हेर्न चाहान्छु ।'
'फिनिस गर्ने कुरामा यदि ठुलो लक्ष्य छ भने आक्रामक खेल्नु पर्ने हुन्छ जुनमा जोखिम हुन्छ, जहाँ आउट हुने सम्भावना हुन्छ र रन पनि बनाउन सकिन्छ । तर आज आसिफको केसमा मलाई लाग्छ उनले खेल राम्रो तरिकाले सक्नु पर्ने थियो तर यो खेल हो यहाँ कहिलेकहिँ यस्तो हुन्छ,' सन्दीपले थपे ।
खेलमा दिपेन्द्र सिंह ऐरीले १७ बलमा २१ रन जोडे । १ छक्का र १ चौका प्रहार गरेका ऐरी नेपालको लागि टी-ट्वान्टी अन्तर्राष्ट्रियमा सर्वाधिक रन बनाउने खेलाडीको शीर्ष स्थानमा उक्लिए । ऐरीले पूर्व कप्तान पारस खड्काको ७ सय ९९ रनको कीर्तिमानलाई पछि पारे ।
डेब्यु खेलाडी दिलिप नाथले आक्रामक इनिङ खेल्दै अन्त्यमा नेपाललाई जित दिलाए । उनले ७ बलमा ३ चौका प्रहार गर्दै १५ रनमा अविजित रहे । यस्तै कुशल मल्लले समेत ४ बलमा अविजित २ रनको योगदान गरे ।
मलेसियाका पवनदिप सिंहले २, मुहमद अमिर र सेइद अजिजले समान १/१ विकेट लिए ।
नेपालले सिरिजमा लगातार दोस्रो जित निकाल्दै फाइनल नजिक पुगेको छ । पहिले खेलमा नेपालले पपुवा न्युगिनी (पीएनजी) लाई १५ रनले पराजित गरेको थियो ।
मलेसियाले समेत पहिलो खेलमा पपुवा न्युगिनीलाई पराजित गर्दा नेपालविरुद्धको खेल रोमाञ्चक हुने अपेक्षा गरिएको थियो । तर खेलको पहिलो बलमा करण केसीले खतरानक ब्याटर विरन्दिप सिंहलाई बोल्ड गर्दै नेपाललाई उत्कृष्ट सुरुवात दिलाएपछि नेपाल खेलमा पूर्ण रुपमा हाबी रह्यो ।
टस जितेर मलेसियाले पहिले ब्याटिङ रोजेको खेलमा नेपालका बलरहरुले उत्कृष्ट प्रदर्शन गरे । खेलमा नेपालका बलरहरुले उत्कृष्ट प्रदर्शन गरेपछि नेपाललाई सहज जित हात परेको कप्तान सन्दीप लामिछानेले बताए ।
'बलरहरुले सुरु देखि नियमित अन्तरालमा विकेट पाइराख्नु र विकेट पनि आज सुख्खा भएको कारण बल बीच बीचमा रोकिएर आएको थियो । त्यसले गर्दा ब्याटिङ गर्न सजिलो पनि थिएन तर त्यति गारो पनि थिएन । श्रेय जति बलरलाई जान्छ, सुधार्नु पर्ने केहि कुरा भएपनि मलाई लाग्छ बलरहरुले आफ्नो तर्फबाट सबै समर्पित गरेका थिए,' सन्दीपले भन्छन्, 'विरन्दिपको विकेट सुरुवातमा लिनु हाम्रो लागि बोनस पोइन्ट रह्यो । त्यसबाहेक पनि खेलमा बलिङबाट खेलमा हावी हुने मौका भइरह्यो । बलिङमा जस्तै ब्याटिङमा पनि हावी हुन सक्यौं र १३ ओभर केहि बलमा लक्ष्य भेट्टाउनु आउने खेलको लागि राम्रो लक्षण हो र हामीले आज राम्रो अभ्यासको मौका पायौं ।'
टी-ट्वान्टी अन्तर्राष्ट्रिय सिरिजअघि नेपालले घरेलु मैदानमा पपुवा न्युगिनसँग एकदिवसीय अन्तर्राष्ट्रिय सिरिज खेलेको थियो । दुई खेलको एकदिवसीय अन्तर्राष्ट्रिय सिरिजमा नेपाल पहिलो पटक क्लिन स्विप भएको थियो ।
खराब नतिजाबाट आजित भएको नेपालले टी-ट्वान्टी अन्तर्राष्ट्रिय सिरिजको दुई खेलमा दुई जित निकाल्दा खुसी छ र लिग चरणका सबै खेल जितेर फाइनल समेत जित्ने सबैको लक्ष्य रहेको सन्दीपले बताए ।
'सबैजना यहाँ हामी यो सिरिज जित्नको लागि छौं । सकेसम्म यो चारवटै खेल जितेर, हामी फाइनलमा गएर पनि जित्ने लक्ष्य छ । हामीले केहि कुरा पनि हलुका लिनु हुन्न किनकि हामी अझै फाइनल पुगेका छैनौं, कम्तिमा एक खेल जित्नु छ,' सन्दीपले भने ।
११ महिनापछि टी-ट्वान्टी अन्तर्राष्ट्रिय क्रिकेट खेलेको मलेसियाले सिरिजको पहिलो खेलमा पपुवा न्युगिनीलाई ८ रनले पराजित गर्दै सुखद सुरुवात गरेको थियो । नेपालसँग हार्नुको अघिल्लो दिन उसका दुई खेलाडीले अर्धशतक बनाउँदा एक खेलाडी ४७ रनमा आउट भएका थिए । पीएनजीविरुद्ध आक्रामक ब्याटिङ गरेकोक मलेसियाले नेपालमाथि ठुलो लक्ष्य दिने योजना नेपालका बलरहरुले विफल पारिदिए ।
नेपालविरुद्ध पहिले ब्याटिङ गरेको मलेसियाका ४ खेलाडीले मात्र दोहोरो अंक छुन सके । २० ओभर ब्याटिङ गरेको मलेसियाले ८ विकेट गुमाएर मात्र १ सय १४ रन बनायो । उसका जुबाइदी जुल्किफलले ३२, अहमद फाजीले २४, सेइद अजिजले १४ र मुहमद अमिरले १६ रन बनाउनु बाहेक अन्य खेलाडीले दोहोरो अंक छुन सकेनन् ।
मलेसियालाई सस्तैमा रोक्न करणले ३ ओभरमा १६ रन खर्चेर २ विकेट लिए । सन्दीप ४ ओभर बलिङ गर्दै २७ रन खर्चेर २ विकेट लिए । कुशल मल्लले १ ओभरमा ३ रन खर्चेर १ विकेट लिंदा दिपेन्द्र सिंह ऐरीले ४ ओभरमा १ मेडेन राख्दै १४ रन दिएर १ विकेट लिए । अविनास बोहराले ४ ओभरमा २६ रन खर्चिएर १ विकेट लिए ।
डबल राउण्ड रोबिनमा हुने सिरिजको तेस्रो खेलमा नेपालले बिहीबार पीएनजीसँग खेल्नेछ । नेपालले पीएनजीलाई पराजित गरे एक खेल अगावै नेपाल फाइनल पुग्नेछ ।
-1751597995.webp)
-1751593454.webp)
