आयोजकलाई हराउँदै एनआरटी फाइनलमा  

नवराज चौलागाई

निजगढ । न्युरोड टिम एनआरटी जितपुरसिमरा गोल्डकप फुटबल प्रतियोगिताको फाइनलमा प्रवेश गरेको छ ।

बुधबार भएको पहिलो सेमिफाइनलमा आयोजक नवजनजागृति युवा क्लब सिमरा बारालाई ३-२ गोल अन्तरले पराजित गर्दै एनआरटी उपाधि नजिक पुगेको हो ।

एनआरटीको जितमा स्टेफन समिरले ३१ औं मिनेटमा गोल गर्दै सुरुआती अग्रता दिलाएका थिए ।

आयोजक नवजनजागृतिले ६५ औं मिनेटमा आयुष घलानको गोलबाट खेल बराबरीमा ल्यायो ।   

खेलको ८५ औं मिनेटमा मेसुकेले गोल गर्दै एनआरटीलाई २-१ को अग्रता दिलाए । लगत्तै ८७ औं मिनेटमा स्टेफन समिरले व्यक्तिगत दोस्रो गोल गर्दै एनआरटीको अग्रता ३-१ को बनाए ।

त्यसपछि खेलको ईन्ज्युरी समयमा आयोजक टिमका एलन थापाले गोल गरेपनि नवजनजागृति ३-२ गोल अन्तरले पराजित भयो ।

यस्तै ईन्ज्युरी समयमा नवजनजागृति दश खेलाडीमा सिमित बनेको थियो । नवजनजागृतिका डोना थापालाई रेफ्रीले रातो कार्ड देखाएका थिए ।

खेलको म्यान अफ द म्याच एनआरटीका दुई गोल गरेका स्टेफन समिर घोषित भए । म्यान अफ द म्याच घोषित स्टेफनले पांच हजार रुपैंया प्राप्त गरे ।

प्रतियोगिता अन्तर्गत बिहिबार हुने दोश्रो सेमिफाइनल खेलमा नेपाल एपीएफ क्लब र बागमती युवा क्लब सर्लाहीबीच प्रतिस्पर्धा हुनेछ ।