उपाधिको लागि पुलिस र मनाङ भिड्ने
इलाम । दमक गोल्डकपको उपाधिको लागि डिफेन्डिङ च्याम्पियन नेपाल पुलिस क्लब र मनाङ मर्स्याङदी भिड्ने भएका छन् ।
बुधबार भएको दोस्रो सेमिफाइनलमा गोर्खा ब्वाइज रुपन्देहीलाई १-० गोल अन्तरले पराजित गर्दै पुलिसले मनाङसँगको उपाधि भेट पक्का गरेको हो ।
पुलिसको जितमा निरकुमार राईले निर्णायक गोल गरे । खेलको ५९ औं मिनेटमा उनले डिएरियाबाट गरेको प्रहार गोलमा परिणत भएको थियो ।
खेलको म्यान अफ दि म्याच नीरकुमार भए । उनले नगद दश हजार रुपैयाँ प्राप्त गरे ।
निकै प्रतिस्पर्धातमक खेलमा गोर्खा ब्वाइजले गोल गर्ने प्रयास गरेको थियो । तर, सफल हुन सकेन ।
अब पुलिसले शुक्रबार उपाधिका लागि मनाङसँग प्रतिस्पर्धा गर्नेछ ।
दमक नगर खेलकुद विकास समितिको आयोजनामा भएको प्रतियोगितामा चार विदेशी टोलीसहित दश टोलीको सहभागिता थियो ।
प्रतियोगिताको विजेताले १३ लाख ११ हजार तथा उपविजेताले ६ लाख ११ हजार नगदसहित ट्रफी र मेडल प्राप्त गर्नेछन् । सर्वोत्कृष्ट खेलाडीलाई एक थान मोटरसाइकल दिइने छ ।
सर्वाधिक गोलकर्ता, उत्कृष्ट गोलरक्षक, डिफेन्डर, मिडफिल्डर, प्रशिक्षक र फरवार्डले जनही नगद २१ हजार रुपैयाँ प्राप्त गर्ने छन् ।
