काठमाडौं । दोस्रो संस्करण सुरु हुन नपाउँदै फ्रेन्चाईज फुटबल नेपाल सुपर लिग (एनएसएल)को भविष्य अनिश्चित देखिएको छ । ए डिभिजन क्लबहरुको असन्तुष्टि, एन्फाको गैरजिम्मेवारीका कारण एनएसएलको दोस्रो संस्करण निर्धारित समयमै आयोजना नहुने पक्का भएको छ ।
आयोजक नेपाल स्पोर्टस म्यानेजमेन्ट एण्ड इभेन्ट कम्पनी र सहभागी १० क्लबले बिहीबार संयुक्त प्रेस विज्ञप्ती जारी गर्दै यथास्थितीमा प्रतियोगिता आयोजना गर्न र सहभागीता जनाउन नसकिने प्रस्ट पारेका छन् । बुधबारको एन्फा बैठकको निर्णयबाट सशंकित बनेर एनएसएल र यसमा आबद्ध क्लबहरु पछि हट्ने निर्णय गरेका हुन् ।
एन्फाकै उच्च स्तरका पदाधिकारीबाट गैरजिम्मेवारपूर्ण अभिव्यक्ति आउनु र दोस्रो संस्करणको समापनसँगै एनएसएलसँगको सम्झौता खारेज हुने निर्णयबाट फ्रेन्चाईज प्रतियोगिताको आयोजक र सहभागी क्लब डराएका हुन् । एन्फाकै जिम्मेवार पदाधिकारीले फ्रेन्चाईज प्रतियोगितालाई गोल्डकपको हैसियत दिनु र दोस्रो संस्करणको समापनसँगै एनएसएलको भविष्य अनिश्चित हुने देखिएपछि प्रतियोगिताको आयोजक र सहभागी टिम पछि हटेका हुन्।
प्रतियोगिताको आयोजना र तयारीका लागि पर्याप्त समय नदिएको एनएसएलको गुनासो छ । एनएसएललाई दिएको समयमै अन्य गोल्डकप जुधाएर आफुहरुमाथि एन्फाका पदाधिकारी पुर्वाग्राही बनेको आरोप एनएसएलले लगाएको छ । प्रतियोगिता सञ्चालनका लागि सहजिकरण नभएको अवस्थामा प्रतियोगिता सञ्चालन र सहभागीतामा आफुहरु असमर्थ हुने आयोजक र सहभागी टिमको निष्कर्ष छ ।
एनएसएलले तत्काल प्रतियोगिता स्थगित गर्ने र एन्फाको आसन्न निर्वाचन पर्खने रणनीति अख्तियार गरेको छ । आयोजन टिम मात्र नभएर फ्रेन्चाईजमा आबद्ध क्लबले समेत प्रतियोगिताको दिर्घकालिन सुनिश्चितता खोजेका छन् । उनीहरुले दिर्घकालिन योजना भएमात्र अघि बढ्ने अडान राखेपछि बिहिबार संयुक्त रुपमा तत्काल प्रतियोगिता स्थगित गर्ने निर्णय सार्वजनिक गरिएको थियो ।
कोभिडको महामारीका बीच कर्पोरेट क्षेत्रको आबद्धता सहित सुरु भएको एनएसएलले पहिलो सिजनमै पर्याप्त चर्चा कमाएको थियो । पहिलो सिजनको सफलतासँगै आयोजकले दोस्रो सिजनमा तीन टिम थप गर्दै मोफसल र काठमाडौं गरि दुई स्थानमा प्रतियोगिता आयोजना गर्ने लक्ष्य राखेको थियो । दोस्रो सिजनमा थपिएका टिमले टिमको नाम लिनका लागि मात्र ४८ लाख रुपैयाँसम्म खर्च गरेर थिए । यसले फुटबलप्रति व्यवसायीक घरानाको आकर्षण देखिन्छ ।
सहिद स्मारक ए डिभिजन लिग सञ्चालनकै अवस्थामा एनएसएलको मिति घोषणा भएपछि विवादको सुरुवात भएको हो । लिग सञ्चालनको अवस्थामा एनएसएलको मिति घोषणा भएपछि ए डिभिजनका ठुला क्लब असन्तुष्ट बनेका थिए । त्यसभन्दा अघि बढेर आफुसँग सम्झौतामा रहेका खेलाडीलाई अनुमती बिना एनएसएलका क्लबले मार्की खेलाडीको रुपमा अनुबन्ध गरेपछि ए डिभिजनका क्लब आक्रोशित बने । अझ आफ्ना खेलाडीलाई अक्सनमा राखेर लिलामी गरेपछि अधिकांश क्लब विरोधमा उत्रिएका थिए ।
एन्फाको लापरबाही, एनएसएल आयोजकको अज्ञानता र ए डिभिजन क्लबको विरोधको त्रिकोणात्मक संघर्षमा फ्रेन्चाईज टिमहरुले दुख पाए । ए डिभिजनका क्लबसँग छलफल नगरि खेलाडीलाई अक्सनमा राख्ने एनएसएलको निर्णय प्रतियोगिताका लागि प्रत्युपादक बन्यो । एन्फाभित्र चल्ने घृषिण राजनीतिको सिकार एनएसएल बन्न पुग्यो । एन्फा, ए डिभिजनका क्लब र एनएसएलबीच पर्याप्त छलफल र साझेदारी नहुँदा घरेलु फुटबलमा फ्रेन्चाईज प्रतियोगिताको भविष्य अनिश्चित देखिएको छ । प्रतियोगिताको आयोजक नेपाल स्पोर्टस म्यानेजमेन्ट एण्ड इभेन्ट कम्पनी समेत विकसित पछिल्लो घटनाक्रमले अन्यौलमा देखिन्छ ।
‘भविष्यमा लामो यात्रा गर्ने हिसाबलेनै आएको हो । दुई चार वर्ष चलाउला भनेर आएको हैन । लामो समय सोचेर आएको हौं ।’ एनएसएलका निर्देशक श्रेयाङ्स कार्कीले खेलपाटीसँग भने, ‘हरेक कुरामा प्रश्न चिन्ह लगाएपछि गाह्रो भएको छ ।’
कार्कीले प्रतियोगिता आयोजनाका लागि एन्फाले सहज वातावरण वातावरण नबनाएको गुनासो गरे । ‘एउटा राम्रो प्रतियोगिता बन्न धेरै कुरा चाहिन्छ । नआवश्यक मिडियाबाजीले समस्या बनाउँछ ।’ कार्कीले भने, ‘हामीले हरेक कुरामा कम्परमाइज गरेका छौं । हाम्रो एउटै माग भनेको राम्रो प्रतियोगिता गर्न मिति समयमै देउ भन्ने मात्र हो ।’
एनएसएलले प्रतियोगिता गर्नका लागि भदौं असोजको नयाँ समय माग गरेको छ । दशैं अघि दोस्रो संस्करण आयोजना गर्ने आयोजकको सोच देखिन्छ । त्यस बेलासम्म एन्फामा नयाँ नेतृत्व आउने र म्यानडेट सहित आएको टिमसँग नयाँ सम्झौता गर्ने योजना एनएसएलमा देखिन्छ । एन्फाको आसन्न निर्वाचनबाट आउने नेतृत्वमै एनएसएलको भविष्य देखिन्छ ।
-1753017726.jpeg)
