युवा खेलाडीको टिम बनाउने तयारी

काठमाडौं । युवा खेलाडीलाई समावेश गर्दै राष्ट्रिय टिम निर्माणको तयारीमा रहेको संकेत शुक्रबारदेखि सुरु हुने एकदिवसीय अन्तराष्ट्रिय तथा त्रिदेशीय टी ट्वान्टी सिरिजको लागि नेपालले घोषणा गरेको खेलाडी सुचीबाट गर्न सकिन्छ ।

मंगलबार नेपालले घरेलु मैदानमा हुने दुई सिरिजका लागि दुई फरक टोली घोषणा गरेको छ । १५ सदस्यीय टोली घोषणा गर्दा नेपालले दुई युवा खेलाडी देव खनाल र आदील अन्सारीलाई पहिलो पटक राष्ट्रिय टिममा मौका दिईएको छ । अनुभवी ज्ञानेन्द्र मल्ल र बिनोद भण्डारीलाई टिम बाहिर राखिएको छ ।

विकेटकिपर अनिल शाह र दीलिप नाथले राष्ट्रिय टिममा पुनरागमन गर्र्दा नेपालले एकदिवसीय र टी ट्वान्टी सिरिजलाई केन्द्रित गर्दै दुई फरक टोली घोषणा गर्यो । खेलाडी सुची हेर्दा नेपालले फरक ढाचाको क्रिकेटका लागि फरक टोली बनाउन खोजेको देखिन्छ । एकदिवसीय र टी ट्वान्टी दुवै सिरिजका लागि मात्र ७ खेलाडी समाबेस छन् । दुबै सिरिजका लागि टोलीमा नेपालले ८–८ खेलाडी परिवर्तन छ ।

प्रतियोगिताअघि नेपालका मुख्य प्रशिक्षक पुबुदु दशानायकेले अहिले युवा खेलाडीको टिम बनाउने चरणमा रहेको बताएका छन् । नेपाल क्रिकेट संघ क्यानले आयोजना गरेको पत्रकार सम्मेलनमा पुबुदुले यस प्रतियोगिता आगामी मेमा हुने आईसीसी विश्वकप लिग टुको सिरिजका लागि महत्वपूर्ण हुने समेत बताए ।

‘युवा क्षमतावान खेलाडी टिममा छन् । हामी युवा टिम बनाउने चरणमा छौं ।’ पीएनजीविरुद्धको सिरिजअघि पुबुदुले भने, ‘मुख्य प्रतियोगिताअघि यो निकै महत्वपूर्ण हुन्छ । यस प्रतियोगिताले आगामी मेमा अमेरिकामा हुने सिरिजको लागि मद्दत गर्छ । यस सिरिजका लागि हामी तयार छौं ।’

कप्तान सन्दीप लामिछानेले समेत यस प्रतियोगितामा नयाँ र युवा खेलाडीलाई अवसर दिने बताए । ‘पक्कै पनि युवा खेलाडी नेपालबाट खेलेको देख्ने छौं र यसले प्रेरित गर्ने छ ।’ सन्दीपले भने, ‘यो लामो यात्रा हो र यो सबैको लागि राम्रो अवसर पनि हो ।’    नेपाल क्रिकेट संघ ९क्यान० को आयोजनामा शुक्रबार देखि  पपुवा न्युगिनी ९पीएनजी० विरुद्धको एकदिवसीय अन्तराष्ट्रिय क्रिकेट सिरिज सुरु हुँदै छ । त्रिवि क्रिकेट मैदानमा नेपालले पाहुना टोली पीएनजीलाई आतिथ्यता गर्दैछ ।

पीएनजी पहिलो पटक नेपालमा क्रिकेट खेल्न लागेको हो । क्यानले एकदिवसीय अन्तराष्ट्रिय सिरिज आयोजना गर्न लागेको यो दोस्रो पटक हो । यसअघि सन् २०२० मा आईसीसी विश्वकप लिग टु अन्तर्गतको अमेरिका, ओमान र नेपाल सम्मिलित सिरिज क्यानले आयोजना गरेको थियो ।
 
दुई वर्षपछि क्यानले पीएनजीलाई आमन्त्रण गर्दै घरेलु भूमिमा एकदिवसीय अन्तराष्ट्रिय क्रिकेट फर्काएको छ । नेपालले पीएनजीसँग घरेलु भूमिमा दुई एकदिवसीय क्रिकेट खेल्नेछ । एकदिवसीय सिरिज लगत्तै नेपाल र पीएनजीले मलेसियासँग त्रिदेशीय टी ट्वान्टी प्रतियोगिता खेल्नेछन् ।

एकदिवसीय सिरिजका म्यान अफ द म्याचले १ सय ५० अमेरिकी डलर तथा म्यान अफ द सिरिजले ३ सय अमेरिकी डलर प्राप्त गर्ने क्यानका कोषाध्यक्ष रोशन कुमार सिंहले जानकारी गराए । यस्तै टी ट्वान्टी सिरिजका म्यान अफ द म्याचले १ सय अमेरिकी डलर तथा म्यान अफ द सिरिजले ५ सय अमेरिकी डलर प्राप्त गर्ने छन् । प्रतियोगितामा कुल खर्च १ करोड ४२ लाख ६० हजार हुने क्यानले जनाएको छ । क्यानले सिरिजको व्यवसायीक अधिकार सुन्बी होल्डिङलाई १ करोड २० लाखमा बेचेको छ ।