काठमाडौं । यस वर्षको फ्रेन्चाईज फुटबल प्रतियोगिता नेपाल सुपर लिग (एनएसएल) निर्धारित समयमा नहुने भएको छ।
आयोजक नेपाल स्पोर्टस एण्ड इभेन्ट म्यानेजमेन्ट कम्पनी र एनएसएलमा आबद्ध १० टिमको संयुक्त बैठकले अखिल नेपाल फुटबल संघ (एन्फा)को असहयोग र असन्तुष्ट क्लबको विरोधका कारण निर्धारित समयमा प्रतियोगिता गर्न नसकिने प्रष्ट पारेका छन् ।
दोस्रो संस्करणको एनएसएल प्रतियोगिता चैत २६ गतेबाट सुरु हुने घोषणा गरिएको थियो । एन्फाले बुधबारमात्र प्रतियोगिताको मिति स्वीकृत गरेको थियो ।
बैठकपछि संयुक्त प्रेस विज्ञप्ती जारी गर्दै आयोजक र सहभागी टिमले समस्या समाधानका लागि ए डिभिजनका क्लब तयार नहुनु र समस्या समाधानका लागि समिति गठन गरेर अघि बढ्न ढिलाई भएका कारण निर्धारित समयमा प्रतियोगितामा सहभागी हुन नसकिने बताएका छन् ।
एनएसएलले दोस्रो संस्करणको प्रतियोगिता सञ्चालनका लागि १५ दिनअघिमात्र स्वीकृती दिनु र एनएसएल भन्दा पछि माग गरिएको मोफसलका गोल्डकप प्रतियोगितालाई एनएसएलसँग जुधार स्वीकृती दिनुले एन्फाका पदाधिकारी एनएसएलप्रति पुर्वाग्रही बनेको आयोजक र एनएसएलका टिमको आरोप छ ।
एनएसएलले हाल कायम रहेको सम्झौता स्वत नविकरण हुने र आगामी दिनमा वार्षिक क्यालेन्डरमा राखेर अन्य प्रतियोगितासँग नजुध्ने गरि पर्याप्त तयारीको समय दिएर भाद्र र असोज महिनाका लागि प्रतियोगिता सञ्चालनको समय उपलब्ध गराउन एन्फासँग माग गरेको छ ।
दोस्रो संस्करणको एनएसएलको लागि आयोजकले चैत २६ गतेको मिति घोषणा गर्दै अक्सनमार्फत खेलाडी समेत लिलामी गरेको थियो । यस वर्ष तीन टिमलाई थप गर्दै एनएसएलले प्रतियोगिता खेल्ने टिमको संख्या १० पुर्याएको थियो । प्रतियोगिता काठमाडौं र पोखरामा सञ्चालन गर्ने आयोजकको तयारी थियो ।
तर आफुसँग सम्झौतामा रहेका खेलाडीलाई क्लबको स्वीकृती बिना अनुबन्ध गर्ने एनएसएलको कदमको ए डिभिजनका चार क्लबले विरोध गर्दै आएका थिए । विवाद समाधानका लागि ए डिभिजनका क्लब, एनएसएल र एन्फा निरन्तर छलफलमा थिए तर सहमती निस्किएको थिएन ।
एन्फाको कार्यसमितिले विवाद समाधानका लागि अध्यक्ष कर्माछिरिङ शेर्पाको नेतृत्वमा ७ सदस्यीय कमिटि गठन गरेको थियो । समितिको बुधबारको बैठकले दोस्रो संस्करणको समापनसँगै एनएसएलसँगको सम्झौता खारेज हुने र एनएसएलका क्लबले खेलाडी अनुबन्धका लागि क्लबसँगै संवाद गर्नुपर्ने नयाँ निर्णय गरेपछि एनएसएलमा आबद्ध क्लब अफठ्यारोमा परेका थिए ।
आयोजक नेपाल स्पोर्टस एण्ड म्यानेजमेन्ट प्राली र सहभागी क्लब विराटनगर सिटी एफसी, विरगञ्ज युनाईटेड एफसी, बुटवल लुम्बिनी एफसी, धनगढी एफसी, एफसी चितवन, झापा एफसी, काठमाडौं रेजर्स एफसी, ललितपुर सिटी एफसी र पोखरा थन्डर्स र स्पोर्टिङ इलाम एफसी दि मेचीको बिहीबारको बैठकले वर्तमान अवस्थामा प्रतियोगिता आयोजना र सहभागी हुन नसक्ने निष्कर्श निकाल्दै एन्फाले सहजीकरण नगरेको अवस्थामा आगामी दिनमा प्रतियोगिता सञ्चालन र सहभागी हुन नसक्ने संयुक्त रुपमा प्रस्ट पारेका छन् ।
एनएसएलको विज्ञप्ति -
-1753017726.jpeg)
