'मछिन्द्रका खेलाडी छैनन् भनेर रुने वाला छैन'

काठमाडौं । नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताईरीले थाइल्याण्डविरुद्धको मैत्रीपूर्ण खेलमा मछिन्द्र फुटबल क्लबका खेलाडी नभएपनि टोलीलाई समस्या नपर्ने बताएका छन् ।

थाइल्याण्ड जानुअघि अखिल नेपाल फुटबल संघ (एन्फा) ले गरेको बिदाइमा बोल्दै प्रशिक्षक अल्मुताईरीले मैत्रीपूर्णमा मछिन्द्रका खेलाडी नहुँदा फरक नपर्ने बताए ।

'मछिन्द्रका खेलाडीहरु क्याम्पमा आएनन् र उनीहरु राष्ट्रिय टिममा छैनन् । मलाई लाग्छ जब राष्ट्रिय टिमको कुरा गर्छौं, हामीले अन्य कुराको वास्ता गर्नु हुँदैन कि मछिन्द्रका खेलाडी हामीसँग होस् या नहोस, त्यसले केहि फरक पार्दैन,' प्रशिक्षक अल्मुताईरीले भने, 'नेपाल राष्ट्रिय टिम सबै भन्दा ठुलो हो । कोच भन्दा ठुलो, संघ भन्दा ठुलो, खेलाडी भन्दा ठुलो, क्लब भन्दा ठुलो, सबै भन्दा ठुलो ।'

नेपालले थाइल्याण्डसँग बिहीबार र थाइ क्लब चोनबरी एफसीसँग आइतबार मैत्रीपूर्ण खेल खेल्दैछ ।

एएफसी एसियन कप छनोट अन्तर्गत तेस्रो चरणको खेल अघि नेपालले थाइल्याण्डसँग खेल्न लागेको हो । तर, सहिद स्मारक ए डिभिजन लिग च्याम्पियन मछिन्द्र फुटबल क्लबमा आबद्द राष्ट्रिय टिमका खेलाडीले थाइल्याण्ड भ्रमण गुमाउने भएका छन् ।

एएफसी कप छनोटको तयारी गरिरहेको कारण मछिन्द्रका खेलाडी टिममा छैनन् ।

मछिन्द्रमा रहेका राष्ट्रिय टिमका विमल घर्ति मगर, विशाल राई, विशाल श्रेष्ठ, मनिष डाँगी, सुनिल बल र देवेन्द्र तामाङले थाइल्याण्ड भ्रमण गुमाउने छन् ।

प्रशिक्षक अल्मुताईरीले मछिन्द्रका खेलाडी छैन भनेर आफु नरुने समेत बताए ।

'मछिन्द्रका खेलाडी मसँग छैनन् भनेर रुने वाला छैन । यो सामान्य हो । हुन सक्छ उनीहरु मसँग एसिया कप छनोटमा समेत हुने छैनन्,' उनले थपे ।

मछिन्द्रले एएफसी कप छनोटमा श्रीलंकाको ब्लू स्टारबीचसँग खेल्ने तालिका रहेको छ ।

त्रिपुरेश्वरस्थित दशरथ रंगशालामा मछिन्द्र र ब्लू स्टारबीचको खेल अप्रिल ५ मा  हुनेछ । 

सहिद स्मारक ए डिभिजन लिगको सातौं चरणसम्म अंकतालिकाको शीर्ष स्थानमा रहेको आधारमा मछिन्द्रले एएफसी कप छनोटका लागि छनोट भएको थियो । 

ब्लू स्टारविरुद्धको खेलमा जित हात पारेको खण्डमा मछिन्द्रले अप्रिल १२ मा भारतको एटीके मोहन बगानविरुद्ध कोलकाताको विवेकानन्द युवा भारती क्रिरांगामा खेल्नेछ । 

समूह चरणमा स्थान बनाउन मछिन्द्रलाई मोहन बगानविरुद्धको खेल पनि जित्नुपर्ने हुन्छ ।