पीपीएल : दिपेन्द्रको धनगढीविरुद्ध पारसको चितवनलाई दबाब

पोखरा । पोखरामा जारी सर्वाधिक पुरस्कार राशीको नमस्ते पोखरा प्रिमियर लिग (पीपीएल) टी–ट्वान्टी क्रिकेट अन्तर्गत बुधबार हुने पहिलो खेलमा चितवन राइनोज र एक्स्पर्ट धनगढी ब्लुजले प्रतिस्पर्धा गर्दैछन् ।

पोखरा रंगशालामा पारस खड्काको चितवन र दिपेन्द्र सिंह ऐरीको धनगढी आफ्नो तेस्रो खेल खेल्न मैदान उत्रनेछन् । दुईबीचको खेल बिहान ९ बजे सुरु हुनेछ ।

चितवन र धनगढी प्रतिस्पर्धाका लागि मैदान उत्रदा जित निकाल्ने लक्ष्यमा हुनेछन् । चितवन पहिलो जितको खोजीमा हुनेछ भने धनगढी दोस्रो जितको खोजीमा हुनेछ ।

अघिल्ला दुई खेलमा पराजित भएको चितवनलाई प्ले अफमा पुग्न जित्न्नै पर्ने दबाब छ । चितवन पहिलो खेलमा बुटवल ब्लास्टर्ससंग ७० रनले पराजित भएको थियो । यस्तै दोस्रो खेलमा पोखरा पल्टनसंग ५ विकेटले पराजित भएको थियो  ।

अघिल्ला दुई खेल गुमाएको कारण धनगढीविरुद्ध चितवन दबाबमा हुनेछ । धनगढीविरुद्ध पराजित भएमा चितवनको प्ले अफ यात्रा लगभग सकिनेछ ।

चितवनले दुई खेल खेल्दा अंकबिहिन रहेर लिगको अन्तिममा छ । तर, चितवनका कप्तान पारसले धनगढीविरुद्धको खेल जित्दै उत्कृष्ट पुनरागमन गर्ने लक्ष्य रहेको बताईसकेका छन् ।

यता, एक खेलमा जित र  एक खेल हारेको धनगढीलाई पनि जित आवश्यक छ । चितवनविरुद्धको जितले धनगढीलाई प्ले अफ यात्रा सहज हुनेछ ।

२ खेलबाट २ अंक जोडेको धनगढी चौथो स्थानमा छ । पहिलो खेलमा हुलास काठमाडौं रोयल्ससंग १७ रनले पराजित धनगढीले दोस्रो खेलमा विराटनगर टाईटन्सलाई ७८ रनले हराएको थियो ।