काठमाडौं । दोस्रो संस्करणको नेपाल सुपर लिग (एनएसएल) को लागि खेलाडीको अक्सन शुक्रबार सम्पन्न भएको छ ।
आयोजक नेपाल स्पोर्टस् एण्ड इभेन्ट म्यानेजमेन्टले आयोजना गरेको अक्सनमा २ सय ४१ खेलाडी सहभागी भएका थिए ।
जसबाट १० टोलीले १५/१५ जना खेलाडी अनुबन्ध गरेका छन् ।
यस पटकको अक्सनमा २१ खेलाडी सर्वाधिक ३ लाख ५० हजार मूल्यमा बिक्री भएका छन् ।
जसमा दीप कार्की विराटनगरमा, मान बहादुर तामाङ र सुदिप गुरुङ विरगंजमा, सुमन अर्याल,रबि पासवान र दर्शन गुरुङ बुटवल लुम्बिनी, सिमान्त थापा, पुजन उपरकोटी र आकाश बुढा मगर धनगढीमा रहेका छन् ।
यस्तै सेसेहाङ आङ्देम्बे, निशान खड्का र सन्तोष तामाङ झापा एफसीमा, आशिष गुरुङ र सुनिल बल काठमाडौं रेजर्स, विशाल सुनार, सनिश श्रेष्ठ ललितपुर एफसी, दिनेश राजवंशी, छिरिङ गुरुङ र एरिक विष्ट पोखरामा, गौतम श्रेष्ठ स्पोर्टिङ इलाम तथा त्रिदेब गुरुङ एफसी चितवनमा सर्वाधिक मुल्यमा अनुबन्धित भएका छन् ।
यस पटकको अक्सनमा धनगढी एफसीले सर्वाधिक धेरै खर्च गरेको छ । धनगढीले २४ लाख खर्चियो ।
स्पोर्टिङ इलामले सबैभन्दा कम खर्च गर्यो । इलामले १८ लाख ५० हजार खर्चिएको छ ।
एनएसएलको दोस्रो संस्करण चैत २६ देखि जेठ ७ गतेसम्म आयोजना हुनेछ ।
१० टोलीको सहभागिता रहने दोस्रो संस्करणको प्रतियोगिता दुई शहरमा आयोजना हुनेछ । प्रतियोगिताका खेलहरु पोखरा र काठमाडौंमा हुनेछ ।
पहिलो संस्करण दशरथ रंगशालामा आयोजना भएको थियो । पहिलो संस्करणमा ७ टोलीले प्रतिस्पर्धा गरेका थिए ।
-1752754328.jpeg)
