रुसी आक्रमणको विरोधमा युरोपेली क्लब र खेलाडी

काठमाडौं । युरोपेली क्लब, खेलाडी र समर्थकहरुले युक्रेनमाथि गरिएको रुसी आक्रमणको विरोध गरेको छ ।

रुसको आक्रमणपछि युरोपियन क्लबका खेलाडी र समर्थकले रुसको विरोध गर्दै युक्रेनको समर्थन गरेका छन् ।

इटालियन क्लब एट्लान्टाबाट खेलिरहेका युक्रेनी स्ट्राइकर रुस्लान मालिनोभास्कीले युरोपा लिगको खेलपछि 'युक्रेनमा युद्द नगरौ' लेखिएको टिसर्ट प्रदर्शन गरेका थिए । उनले २ गोल समेत गरेका थिए ।

बार्सिलोना र नापोलीबीचको खेलपछि दुबै क्लबका खेलाडीले 'युद्द रोक्नुहोस' लेखिएको ब्यानर देखाएका थिए ।

युरोपा लिग अन्तर्गत नै रुसी क्लब जेनिट सेन्ट पिटर्सवर्ग र रियल बेटिसविरुद्धको खेलमा स्पेनिस क्लबका समर्थकले युक्रेनी झण्डा प्रदर्शन गरेका थिए ।

रुसले युक्रेनमाथि बिहीबारबाट आक्रमण सुरु गरेको थियो । जसको विश्वभर विरोध भईरहेको छ ।