सावित्रा आज स्वदेश फर्कदै

काठमाडौं ।  उपचारका लागि कतारमा रहेकी राष्ट्रिय महिला फुटबल टिमकी फरवार्ड सावित्रा भण्डारी आज स्वदेश फर्कने भएकी छिन् ।

अखिल नेपाल फुटबल संघ (एन्फा) ले सावित्रा मंगलबार साँझ नेपाल आईपुग्ने जनाएको छ । एन्फाले सावित्रा साँझ ७:३५ मा नेपाल ओर्लने जनाएको छ ।

सावित्रा घुँडामा लागेको चोटको उपचारका लागि कतार गएकी थिइन् ।

कतारको दोहास्थित अस्पेटार अस्पतालमा सावित्राको चोटको सफल शल्यक्रिया गरिएको थियो ।

राष्ट्रिय टिमकी मुख्य फरवार्ड सावित्राले महिला लिग दौरान चोट बोकेकी थिईन् ।

विभागीय टिम एपीएफबाट खेल्ने क्रममा सावित्राको दाँया खुट्टाको एन्टेरिएर क्रुसिएट लिगामेन्ट (एसिएल) च्यातिएको थियो ।

चोटको कारण सावित्राले लिगको अन्तिम दुई खेल समेत गुमाएकी थिइन् ।  

एन्फाले कतार फुटबल संघको सहयोगमा सावित्राको उपचारको प्रबन्ध अस्पेटार अस्पतालमा मिलाएको हो ।

एन्फाकै पहलमा राष्ट्रिय फुटबल टिमका मिडफिल्डर बिक्रम र फरवार्ड बिमल घर्तिमगरले कतारमा उपचार गरेका थिए ।