काठमाडौं । बागमती प्रदेश सरकारले यसै वर्ष प्रदेश स्तरीय प्रतियोगिता आयोजना गर्ने गरि तयारी अघि बढाएको छ ।
प्रदेश खेलकुद परिषद् बागमती प्रदेशले यस वर्षको चैतभित्र प्रदेश स्तरीय प्रतियोगिता सम्पन्न गर्ने गरि तयारी अघि बढाएको हो ।
प्रतियोगिता आयोजना र सञ्चालनका लागि कार्यविधि पारित गरिसकेको प्रदेश खेलकुद परिषद् अहिले विभिन्न उपसमिति गठनको तयारीमा जुटेको छ ।
‘कोभिडको तेस्रो लहर कम हुने वित्तिकै प्रदेश स्तरीय खेलकुदको आयोजना तिव्र गतिले अघि बढ्छ । प्रतियोगिता सञ्चालनका लागि कार्यविधि पारित गरिसकेका छौं । अहिले उपसमिति गठनको तयारीमा छौं ।’ प्रदेश खेलकुद परिषद् बागमती प्रदेशका सदस्य सचिव सुर्यलाल भण्डारीले खेलपाटीसँग भने ।
संघीय सरकारले आयोजना गर्ने नवौं राष्ट्रिय खेलकुद अन्यौलमा परिरहेको समय बागमती सरकार प्रदेश स्तरीय खेलकुद प्रतियोगिता आयोजनाको तयारीमा जुटेको हो । देश संघीय संरचनामा जाने बित्तिकै प्रदेश खेलकुद विकास ऐन बनाएर संरचना निर्माण गर्ने बागमती पहिलो प्रदेश हो ।
‘स्थानीय तहबाट खेलाडी छनोट भैसकेका छन् । फागुनभित्र जिल्ला प्रतियोगिता सम्पन्न गरेर चैतभित्र प्रदेश स्तरीय प्रतियोगिता गर्न सकिन्छ भन्ने लागेको हो ।’ भण्डारीले भने ।
प्रदेश खेलकुद परिषद् बागमतीको अघिल्लो बैठकले माघ अन्तिमसम्म प्रदेश प्रतियोगिता सम्पन्न गरेर राष्ट्रिय प्रतियोगिताका लागि खेलाडी तयार गर्ने निर्णय गरेको थियो । तर संघीय सरकारसँगै प्रदेश सरकारको परिवर्तन र पछिल्लो समय कोभिड–१९ को तेस्रो लहरका कारण पूर्व निर्धारित प्रदेश प्रतियोगिता केही महिना पछि सर्ने देखिएको छ ।
प्रदेश खेलकुद परिषद् बागमतीले प्रदेश अन्तर्गतका सम्पूर्ण जिल्लालाई समेटेर प्रदेश प्रतियोगिता सञ्चालन गर्ने बताएको छ । प्रदेश अन्तर्गतका सबै जिल्लालाई प्रतियोगिता आयोजनाको जिम्मेवारी दिने र सबैको अपनत्व हुने गरि कार्यक्रम गर्न खोजिएको प्रदेश खेलकुद परिषद्को भनाई छ ।
सदस्य सचिव भण्डारीले भने, ‘प्रदेश अन्तर्गतका विभिन्न १३ जिल्लालाई समेटेर सबै खेल सञ्चालन गर्ने तयारी छ । यसले प्रदेश खेलकुदमा सबै जिल्लाको अपनत्व पनि रहन्छ । र सबै जिल्ला आयोजना र प्रतियोगितामा सहभागी हुन पनि पाउँछन् ।’
प्रदेश खेलकुद परिषद्ले यसअघिनै प्राथमिकताका आधारमा खेलहरुको निर्धारण गरिसकेको छ । प्रदेश ९ खेललाई प्रदेशको प्राथमिकताको सूचिमा राखेर कार्यक्रम सञ्चालन गरिरहेको छ । प्रदेश खेलकुद परिषद्ले पूर्वाधार अभावका कारण पौडीलाई थाती राख्दै अन्य ८ खेलमा प्रदेश खेलकुद आयोजना गर्ने तयारी गरेको छ ।
सदस्य सचिव भण्डारीका अनुसार एथलेटिक्स, फुटबल, भलिबल, क्रिकेट, तेक्वान्दो, कराँते, बक्सिङ, र ब्याडमिन्टनलाई प्रदेश स्तरीय प्रतियोगितामा समावेश गरिनेछ ।
प्रतियोगिता आयोजना र सञ्चालनका लागि आवश्यक कार्यविधि पास गरेर प्रदेश सरकारले प्रदेश स्तरीय खेलकुद प्रतियोगिता आयोजनाको तयारीमा लाग्दा संघीय सरकारको खेलकुद भने लथालिङ्ग छ । राखेपमा सदस्य सचिव र बोर्ड सदस्यको विवाद अदालत प्रवेश गर्दा संघीय सरकारले वार्षिक नीति तथा कार्यक्रम कार्यान्वयन गर्न सकेको छैन ।
पूर्वाधारदेखि प्रतियोगिता आयोजनाको सन्दर्भमा कुनै ठोस काम अघि बढ्न सकेको छैन । राष्ट्रिय प्रतियोगिताको टुङ्गो नलाग्दा त्यसको असर प्रदेश स्तरीय खेलकुद आयोजनामा समेत देखिन्छ ।
प्रदेश खेलकुद परिषद् बागमतीका सदस्य सचिव भण्डारी राष्ट्रिय प्रतियोगिताको अन्यौलताका कारण प्रदेश खेलकुदले टिम तयार गर्दा चिन्ता थपिएको बताउँछन् ।
‘राष्ट्रिय प्रतियोगिताका लागि केन्द्र अघि सर्न पर्दथ्यो । त्यसो नहुँदा राष्ट्रिय प्रतियोगिता अन्यौलमा देखिन्छ । प्रदेश स्तरमा टिम तयार गर्दा राष्ट्रिय स्तरको प्रतियोगिता खेल्न नपाउने चिन्ता छ ।’ भण्डारीले खेलपाटीसँग भने ।
‘राष्ट्रिय प्रतियोगिता समयमा हुने वातावरण भए प्रदेशले उत्पादन गरेका खेलाडीले राष्ट्रिय प्रतियोगिता खेल्न पाउथे ।’ उनले थपे, ‘केन्द्रमा कानुन नबन्ने, प्रणाली नबन्ने अवस्था रह्यो । केन्द्रले प्रदेशबीच प्रतिस्पर्धा गर्ने वातावरण सिर्जना गर्न पर्दथ्यो । तर केन्द्रको संरचना सुस्तायो । यो नै चिन्ताको विषय भएको छ ।
सदस्य सचिव भण्डारी प्रदेश स्तरीय प्रतियोगिता गर्ने पहिलो प्रदेश खेलकुद परिषद् बन्ने गरि सक्रिय भएर प्रतियोगिताको तयारी गरिरहेको बताउँछन् ।
‘सबै प्रदेश मध्य पहिलो पटक प्रतियोगिता सञ्चालन गर्दा अरु प्रदेशले सिको गर्न पाउँछन् । एउटा नजिर स्थापना हुन्छ भनेर प्रतियोगिता गर्न अलि बढी सक्रिय भएर लागेका छौं ।’ उनले भने ।
