एजेन्सी । लिग वान फुटबलमा पेरिस सेन्ट जर्मेन (पीएसजी)ले लियोनसँग बराबरी खेलेको छ ।
आईतबार राति लियोनको घरेलु मैदानमा लिग लिडर पीएसजीले १–१ गोलको बराबरी खेलेको हो ।
खेलको सुरुवातमा घरेलु टोली लियोनले टोलेन्टिनो कोएल्हो डी लिमाले गोलमा अग्रता बनाएको थियो ।
वैकल्पिक खेलाडीको रुपमा मैदान छिरेका थिलो केहररले पीएसजीका लागि बराबरी गोल फर्काए ।
दुवै हाफमा केलियन एमबाप्पेको प्रहार पोस्टमा लागेर फर्कदा पीएसजी निराश बनेको थियो ।
पीएसजीले दोस्रो स्थानको नाइससँग ११ अंकको अग्रता लिएको छ । लगातार चार खेलमा बराबरीको नतिजा निकालेको लियोन तालिकाको ११ औं स्थानमा छ ।
लियोनल मेस्सी सहितका चार खेलाडी पीएसजीको खेलमा उपस्थित थिएनन् । कोभिड पोजेटिभ भएपछि खेलाडीहरु आईसोलेसनमा रहेका छन् । मैदान फर्कन खेलाडीहरुले नेगेटिभ रिपोर्टको प्रतिक्षा गरिरहेका छन् ।
चोटका कारण नेयमार समेत पीएसजीको टोलीमा छैनन् । उनी चोटबाट मुक्त हुन प्रयास गरिरहेका छन् । उनी कम्तिमा तीन हप्ता मैदानमा देखिने छैनन् ।
शीर्ष स्थानको पीएसजी ४७ अंक सहित तालिकाको अग्रस्थानमा छ । लियोन २५ अंक सहित ११ औं स्थानमा छ ।
