काठमाडौं । रुस्लान थ्री स्टार क्लबले शनिबार कतार एयरवेज सहिद स्मारक ‘ए’ डिभिजन लिग फुटबलमा सहज जित निकाल्यो ।
त्रिपुरेश्वरस्थित दशरथ रंगशालामा थ्री स्टारले हिमालयन शेर्पा क्लबलाई २-० गोल अन्तरले हराएको हो ।
जितपछि थ्री स्टार लिगको पाँचौं स्थानमा उक्लिएको छ ।
हिमालयनविरुद्धको जितले थ्री स्टारका मुख्य प्रशिक्षक उर्जन श्रेष्ठ खुशी देखिए । उनले विदेशी खेलाडी अनुबन्ध गरेपछि टिम राम्रो बनेको समेत बताए ।
'जितमा खुसी छु । पहिलो हाफमा गोल हुन सकेन । केही नमिलेको जस्तो थियो । तर दोस्रो हाफमा राम्रो खेल्यो र गोल निस्कियो,' उनले भने 'हामीले विदेशी खेलाडी अनुबन्ध गर्दा टिम राम्रो बनेको छ । यो खेलाडी पहिले नै लिएको भए पहिले नै राम्रो हुने थियो । अब राम्रो हुन्छ ।'
प्रशिक्षक श्रेष्ठले लिगमा टिमको स्थान भन्न सक्ने अवस्था नभएको बताए ।
'आफ्नो रणनीति अनुसार राम्रो खेलिरहेका छौँ । अहिले नै यो स्थान भन्न सक्ने अवस्था छैन,' उनले थपे ।
हिमालयनका मुख्य प्रशिक्षक युगल किशोर राईले पाएको मौकालाई सदुपयोग गर्न नसकेको बताए । उनले शीर्ष तीनको लडाईबाट टिम बाहिरिएको समेत बताए ।
'आज हार्यौ । फुटबलमा स्कोर चाहिन्छ । हामीले पाएको मौका गुमायौ । सुरुमा राम्रै खेलेका थियौ । तर, आत्मघाती गोल हुन पुग्यो,' उनले भने, 'समग्रमा राम्रै खेल्यौ । आज जितेको भए शीर्ष तीनको लागि लडाई हुन्थ्यो । तर अब त्यो रहेन ।'
