हिमालयन शेर्पाविरुद्ध थ्री स्टारको अपराजित यात्रा

काठमाडौं ।  हिमालयन शेर्पाले वर्ष ०६८ को सहिद स्मारक लिग ए डिभिजनबाट डेब्यु गरेको थियो, माथिल्लो लिगमा ।

त्यसयता उसले थ्री स्टारविरुद्ध पाँच खेल खेलेकोमा अहिलेसम्म जित निकाल्न सकेको छैन् । त्यसको अर्थ थ्री स्टार लिगमा हिमालयन शेर्पाविरुद्ध अपराजित रहेको समृद्ध इतिहास रहनु नै हो ।

यसपल्टको लिगमा थ्री स्टारले यही हिमालयन शेर्पालाई आइतबार दशरथ रंगशालामा हुने खेलमा सामना गर्दा यो यात्रालाई कायम राख्न चाहनेछ ।

थ्री स्टार ती पाँच खेलमध्ये तीनमा विजयी रहेको छ भने दुई बराबरीमा टुंगेका छन् । थ्री स्टारले वर्ष ०७६ मा ३–१ को जित निकालेको थियो ।

त्यसमा थ्री स्टारका लागि सुशील राई, सन्जोक राई र वासियु ओलाडिरनले गोल गरेका थिए । हिमालयन शेर्पाका तर्फबाट स्टेफन समिरले एक गोल फर्काए ।

यस्तै थ्री स्टार वर्ष ०७५ मा २–० र वर्ष ०६९ मा ३–२ ले विजयी रह्यो । यी दुई टिमले वर्ष ०७० मा २–२ र वर्ष ०६८ मा १–१ को बराबरी खेले ।

अहिले तत्काल थ्री स्टार सात खेलबाट १० अंक जोडेर छैटौं स्थानमा छ भने हिमालयन शेर्पाको सातै खेलबाट ११ अंक छ र पाँचौं स्थानमा छ ।

आजको खेलमा हिमालयन शेर्पाले थ्री स्टारलाई पहिलो पल्ट हराउन सक्छ भने त्यसको पुरस्कार हुनेछ, लिग अंक तालिकाको शीर्ष चार स्थानमा उसको पहुँच ।