बेसीसहर । लमजुङको बेसीसहरमा जारी २९ औं त्रिवेणी कप फुटबल प्रतियोगिताको फाइनल खेल आज बुधबार हुँदैछ ।
उपाधिका लागि बुद्ध युवा क्लब र श्री भगवती क्लबबीच प्रतिस्पर्धा हुनेछ । फाइनल खेल १ बजे सुरु हुनेछ ।
फाइनलको प्रत्यक्ष प्रशारण खेलपाटी डटकमले गर्नेछ । खेलपाटीको फेसबुक र युट्युबमा प्रत्यक्ष प्रशारण हुनेछ ।
मंगलबार भएको दोस्रो सेमिफाइनलमा समाज कल्याणलाई ३-० ले हराउँदै बुद्धले श्री भगवतीसँगको भेट पक्का गरेको हो।
यस्तै पहिलो सेमिफाइनलमा आयोजक तथा साविक विजेता त्रिवेणी युवा क्लबलाई ३-० ले हराउँदै श्री भगवती उपाधि नजिक पुगेको हो ।
प्रतियोगिताको विजेताले ५ लाख र उपविजेताले ३ लाख पाउने आयोजक त्रिवेणी युवा क्लबले जनाएको छ ।
प्रतियोगितामा १८ टोलीको सहभागिता रहेको थियो ।
