काठमाडौं । सर्जियो अग्युरोले अबदेखि फुटबल नखेल्ने भनेपछि उनका एक जना नजिकका साथीले उनीबारे भावनात्मक सन्देश दिएका छन् ।
यी नजिकका साथी अरू कोही होइनन्, लियोनल मेस्सी हुन् । अर्जेन्टिनी फुटबल खेलाडीमध्ये मेस्सी र अग्युरोको दोस्ती नजिकको मानिन्छ । यो दोस्ती खासमै कति धेरै नजिक छ भने अग्युरोले मेस्सीसँगसँगै खेल्न बार्सिलोना गएका थिए ।
तर संयोग कस्तो रह्यो भने अग्युरो बार्सिलोना आउनु र मेस्सीले बार्सिलोना छाड्नु एकै समय भयो ।
अहिले तिनै अग्युरोले बार्सिलोना पनि छाडे जस्तै भयो, किनभने मुटुको समस्याका कारण उनले आफ्नो खेल जीवनबाटै सन्यास लिएका छन् । चिकित्सकहरूले उनलाई सिधा सिधा भनेका थिए, ‘अबदेखि फुटबल नखेल्नु ।’
मेस्सीले इन्स्ट्राग्राममा लेखेका छन्, ‘हामीले अर्जेन्टिनाका लागि धेरै समय सँगै खेलेका छौं । यसबीचमा हामीले केही निकै सम्झनालायक क्षण पनि बिताएका छौं, जस्तो केही समय अगाडि मात्र हामीले कोपा अमेरिका जितेका थियौं । तिमी सधैं खुसी रहनु । अब तिम्रो जीवन नयाँ अध्याय सुरु हुँदैछ ।’
मेस्सीले अगाडि लेखेका छन्, ‘आई लभ यु भेरी मच माई फ्रेन्ड ।’
