संकटाको जितमा निरजको निर्णायक गोल

काठमाडौं । सहिद स्मारक ‘ए’ डिभिजन लिग फुटबलमा संकटा क्लबले विभागीय टिम नेपाल पुलिस क्लबलाई पराजित गरेको छ  ।

त्रिपुरेश्वरस्थित दशरथ रंगशालामा सोमबार भएको खेलमा संकटाले पुलिसलाई १-० गोल अन्तरले पराजित गरेको हो ।

संकटालाई जित दिलाउन निरज बस्नेतले निर्णायक गोल गरे ।

निरजले खेलको १८ औं मिनेटमा गोल गरेका हुन् । लक्ष्मण रुचालको कर्नरमा उनले डाइभिङ हेडमार्फत सुन्दर गोल गरे ।  

निरजको लिगमा यो तेस्रो गोल हो । यस गोल जारी लिगको ५० औं गोल समेत हो ।

निरजले निर्णायक गोल गरेपनि खेल अवधिभर संकटा हाबी रह्यो । सुरुवातबाटै संकटाले पुलिसविरुद्ध आक्रामक खेल पस्कियो ।

दोस्रो मिनेटमै सुवास गुरुङको क्रसमा संकटाका जोर्डन जुनियरले सिक्स यार्ड बक्सबाट बाहिर प्रहार गरे ।

खेलको चौंथो मिनेटमा संकटाले गोलको अवसर गुमायो । जोर्डनको क्रसमा फरवार्ड फोडे फोफानाको हेडर क्रसबार भन्दा केहि माथिबाट बाहिरियो ।

दशौँ मिनेटमा संकटाका जोर्डनको प्रहार गोललाइन नजिकै रहेका पुलिसका डिफेन्डरलाई लाग्दै फर्किएको थियो ।

लगत्तै फोफानाको क्रसमा अनमार्क रहेका लक्ष्मणको प्रहार पुलिसका गोलकिपर रोशन खड्काले पन्च गर्दै गोल हुनबाट जोगाए ।

तुलनात्मक रुपमा पुलिसले गोलको अवसर कम सिर्जना गर्यो । तर, ४३ औं मिनेटमा पुलिसले गोलको सुनौलो अवसर गुमायो  । संकटाका निरजले क्लियर गर्न खोजेको बलमा सिक्स यार्ड बक्स भित्रबाट सुमन लामाको एक्रोब्याटिक प्रहार संकटाका गोलकिपर राजा बाबु थापाले उत्कृष्ट बचाउ गरे ।

यस जितसँगै संकटा लिगको चौंथो स्थानमा उक्लिएको छ । संकटाले ४ खेलमा ८ अंक जोडेको छ । संकटाको यो लिगमा दोस्रो जित हो ।

पुलिसले भने लिगमा पहिलो हार व्यहोरेको छ । पुलिसले ४ खेलमा ५ अंक जोडेको छ । पुलिस लिगको सातौं स्थानमा रहेको छ ।

खेलमा संकटाका निरज म्यान अफ दि म्याच चुनिए ।

संकटाकै रोशन पहारी इमर्जिङ प्लेयर चुनिए ।