एपीएफ १ सय ५० औं खेल खेल्दै

काठमाडौं । सहिद स्मारक लिग 'ए' डिभिजन ०७८ मा एपीएफले थ्री स्टारको सामना गर्दा त्यो शसस्त्र बलको विभागीय टिमका लागि विशेष हुनेछ ।

किनभने उसले माथिल्लो डिभिजनको लिगमा आफ्नो १ सय ५० औं खेल खेल्दैछ । तर, यो उपलब्धी छुन लाग्दा एपीएफको ध्यान भने हारबाट कसरी जोगिने हो, त्यसमै केन्द्रित हुनेछ ।

एपीएफले अहिलेसम्म खेलका तीनै खेलमा हार बेहोरेको छ र लिग तालिकाको पुछारमा छ, विना कुनै अंक ।

यस्तोमा कुमार थापाको प्रशिक्षणमा रहेको एपीएफ रेलिगेसनबाट बच्न संघर्षरत छ ।

एपीएफले ०६२ देखि माथिल्लो डिभिजनमा खेल्न थालेको हो र उसले सातदोबाटोविरुद्ध यसपल्ट तेस्रो चरणमा खेलेको खेल १ सय ४९ औं हो ।
लिगका पछिल्ला पाँच संस्करणलाई आधार मान्ने हो भने थ्री स्टार एपीएफमाथि पूर्णत: हाबी रहेको छ ।

एपीएफले वर्ष ०६८ मा अन्तिम पटक थ्री स्टारलाई हराएको थियो र त्यति बेला स्कोर निस्केको थियो, उत्साहबर्दक ४–० को जित । यसमा चारै गोल गरेका थिए, गणेश लावतीले । तर त्यसयता एपीएफ कहिले पनि त्यस्तै बलियो टिम बन्न सकेन् ।

त्यसपछिका पाँच खेलमा थ्री स्टार लगातार विजयी रहेको छ । यस्तोमा थ्री स्टार एपीएफविरुद्ध लगातार छैटौं जित निकालेर अहिलेको लिगमा उपाधि होडमा फर्कन चाहनेछ र यसका लागि कमजोर मानसिकताबाट गुज्रिरहेको एपीएफमाथि निश्चित जित निकाल्न दबाब नै हुनेछ । अन्यथा थ्री स्टार यसपल्ट पनि उपाधिको होडमा कमजोर हुन सक्छ ।

वर्ष ०६९ मा थ्री स्टारले एपीएफलाई २–१ ले हराएको थियो । वर्ष ०७० मा यी दुई टिमबीच दुई भेट भएकामा त्यसमा थ्री स्टार समान २–१ र २–१ ले नै विजयी रह्यो ।

वर्ष ०७५ मा रञ्जन विष्टको दुई गोलमा थ्री स्टार २–० ले विजयी रह्यो ।

पछिल्लो ०७६ को लिगमा भने थ्री स्टारले अनन्त तामाङको निर्णायक गोलमा १–० को जित निकालेको थियो ।