काठमाडौं । नवप्रवेशी सातदोबाटो युथ क्लबले सहिद स्मारक 'ए' डिभिजन लिग फुटबलमा अपराजित यात्रा कायम राखेको छ ।
त्रिपुरेश्वरस्थित दशरथ रंगशालामा शुक्रबार सातदोबाटोले विभागीय टिम एपीएफ क्लबलाई ४-१ गोलको फराकिलो अन्तरले पराजित गर्यो ।
सातदोबाटोलाई जित दिलाउन मार्टिन्स अजयीले ह्याट्रिक गोल गरे । सुशील राईको नाममा एक गोल रह्यो ।
एपीएफलाई हराएसँगै सातदोबाटो लिगको शीर्ष स्थानमा उक्लिएको छ ।
तर, सातदोबाटोका मुख्य प्रशिक्षक मेघराज केसीले अहिले अंक तालिका हेर्ने समय नभएको बताए । धेरै खेलहरु बाँकी रहेको कारण अहिले तालिका हेर्ने समय उचित नभएको उनको भनाइ छ ।
'अहिले हाम्रो टेबलमा हेर्ने बेला भएको छैन । ५०% नसकिएसम्म केही भन्न सकिन्न । तेस्रो चरणको खेल सकिएपछि बरु तालिका हेर्न सकिन्छ । अहिले समय भएको छैन,' केसीले भने ।
सातदोबाटोले ३ खेलमा ७ अंक जोडेको छ । र, मनाङलाई पछि पार्दै सातदोबाटो शीर्ष स्थानमा उक्लिएको हो ।
प्रशिक्षक केसीले वर्षाको कारण एपीएफविरुद्ध चित्तबुझ्दो खेल नभएको बताए ।
'आज पानी परेकाले चित्त बुझ्दो खेल भएन । जस्तो खेल हुनु पर्ने थियो भएन । जित्दा खुसी छु । एपीएफले राम्रो खेल्यो । उनीहरुको मिड राम्रो थियो । तर पोस्ट चार्ज अलि कम गरे । हाम्रो डिफेन्स राम्रो भयो,' उनले भने ।
यस्तै प्रशिक्षक केसीले टिमको अग्रपंक्तिमा अझै सुधारको आवश्यकता रहेको बताए ।
'हामिले पहिलो खेलमा दुई अंक गुमायौं । अब बाँकी १० खेल जितकै लागि खेल्ने छौ । हाम्रो स्ट्राइकरमा सुधार भएको अझै छैन । सुधार्दै छौँ,' उनले थपे ।
केसीले एपीएफको पहिलो रोजाईका गोलकिपरको अनुपस्थितिको फाईदा भएको समेत बताए ।
