काठमाडौं । युवा तथा खेलकुद मन्त्रालय नेपाली कांग्रेसको भागमा परेको छ । सत्ता गठबन्धन आबद्ध दलको बैठकले मन्त्रालय बाँडफाँटको क्रममा युवा तथा खेलकुद मन्त्रालय कांग्रेसलाई दिने सहमती गरिसकेका छन् ।
युवा परिचालन र जनतासँग सेवाको हिसाबले जोडिने मन्त्रालयको रुपमा युवा तथा खेलकुद मन्त्रालयलाई हेरिन्छ । खेलकुदको माध्यमबाट देशभरै युवा परिचालन र प्रभाव विस्तार गर्न सकिने भएकाले कांग्रेसले खेलकुद मन्त्रालयलाई यस पटक आफैसँग राखेको छ ।
खेलकुदमा नेकपा एमालेको जवर्जस्त उपस्थिती, प्रभाव र हालिमुहालीले कांग्रेसका खेलकुद नेताहरु विरत्तिएका थिए । पछिल्लो समय उनीहरुले खेलकुद मन्त्रालय आफैले राख्नुपर्ने सुझाव नेतृत्व समक्ष राख्दै आएका थिए ।
सत्तामा कांग्रेसको नेतृत्व आउने वित्तिकै कांग्रेस आबद्ध खेलकर्मी हौसिएका छन् । कांग्रेस नेतृत्वको सरकार बन्ने वित्तिकै प्रकाशशम्शेर राणाले राखेपको निर्देशन अवज्ञा गर्दै नेपाल तेक्वान्दो संघको निर्वाचननै गरे । तेक्वान्दो संघकै निर्वाचनले आगामी दिनमा घरेलु खेलकुदमा कांग्रेस नेता–कार्यकर्ताको रजगज चल्न सुरु हुने देखिन्छ ।
को होला मन्त्री ?
सत्ता साझेदारमा मु्ख्य चार दल रहेको गठबन्धनमा दलहरुले मन्त्रालयको भागबन्डा गरिसकेका छन् । कांग्रेसले प्रधानमन्त्री सहित ७ मन्त्रालय, माओवादी केन्द्र, एकीकृत समाजवादी र जसपाले ५–५ मन्त्रालय पाउने तय भएको छ । सुरुवातमै दुई मन्त्रालय लगिसकेको माओवादी केन्द्रले बाँकी तीन मन्त्री र एक राज्य मन्त्री टुङ्गो लगाईसकेको छ । बाँकी दलमा मन्त्री छान्न सकस छ ।
एक समय जीवनराम श्रेष्ठ खेलकुद मन्त्री बनेर आउने खुवै चर्चा थियो । जीवनराम मन्त्री बन्ने चर्चाले घरेलु खेलकुदका महत्वपुर्ण कार्यक्रममा श्रेष्ठको उपस्थिती बाक्लै देखिन्थ्यो ।
एमाले विभाजनपछि एकीकृत समाजवादीमा लागेका जीवनराम सम्मिलित दलको भागमै खेलकुद मन्त्रालय नपरेपछि जीवनराम खेलकुद मन्त्री बन्ने सम्भावना सकिएको छ । खेलकुदबाटै उदाएका नेताका हिसाबले उनी खेलकुद मन्त्रीको रुपमा आउने चर्चा थियो । तर जीवनराम आफैले मालदार मन्त्रालयमा जान खोजेका छन् ।
अब खेलकुद मन्त्री कांग्रेसबाट बन्नेछन् । कांग्रेसको भागमा खेलकुद सहित गृह, रक्षा, परराष्ट्र, स्वास्थ्य तथा जनसंख्या, सञ्चार, सुचना तथा प्रविधि, महिला बालबालिका तथा जेष्ठ नागरिक परेको छ ।
प्रधानमन्त्री तथा पाटी सभापति शेरबहादुर देउवाले गृहमन्त्रीमा बालकृष्ण खाड, परराष्ट्रमा नारायण खड्का, कानुनमा ज्ञानेन्द्रबहादुर कार्की र स्वास्थ्यमा उमेश श्रेष्ठलाई राज्यमन्त्री बनाइसकेका छन् ।
देउवाले कांग्रेस वरिष्ठ नेता रामचन्द्र पौडेललाई दुई र अर्का नेता कृष्ण सिटौलालाई एक मन्त्रालय दिने बताएका छन् । तर पौडेलले तीन मन्त्रालय माग गरेका छन् ।
कृष्ण सिटौलाले उमाकान्त चौधरीलाई मन्त्रीको रुपमा सिफारिस गरेका छन् । सिटौला समुहले मन्त्री मात्र हैन, शक्तिशाली मन्त्रालयको माग समेत छ । सोही कारण उमाकान्त चौधरी युवा तथा खेलकुदमा आउने सम्भावना कम छ ।
धेरैको अरुचीको मन्त्रालय भएका कारण युवा तथा खेलकुद पौडेल समुहमै पर्ने देखिन्छ । पौडेल समुहका शशांक कोइरालाले मिनेन्द्र रिजाललाई मन्त्रीको रुपमा सिफारिस गरेका छन् । पूर्व सञ्चार मन्त्री समेत रहेका मिनेन्द्रको रोजाई समेत मालदार मन्त्रालयनै हुनेछ ।
पौडेल समुहबाट सिफारिस हुने सांसदले खेलकुद मन्त्रालयको जिम्मेवारी पाउने सम्भावना छ । पौडेल स्वयमले तेजुलाल चौधरीलाई मन्त्री बनाउन चाहेका छन् । चौधरी युवा तथा खेलकुद मन्त्रालयका पूर्व राज्य मन्त्री समेत हुन् ।
पौडेल समुहकै अर्का प्रभावशाली नेता प्रकाशमान सिंहले राजन केसीलाई मन्त्रीको रुपमा प्रस्ताव गरेका छन् । उनी समेत पूर्व युवा तथा खेलकुद मन्त्री हुन् ।
सोही कारण पौडेल समूहबाट सिफारिसमा परेका चौधरी र केसी मध्य एकनै युवा तथा खेलकुद मन्त्रालयका सम्भावित मन्त्रीको रुपमा हेरिएको छ ।
पौडेल समूहले थप एक मन्त्री मागेकाले कांग्रेसभित्रको मन्त्रालयको भागबण्डा मिल्न सकेको छैन ।
