काठमाडौं । पारस खड्का र आमिर अख्तरको विवाद उत्कर्षमा छ । एभरेष्ट प्रिमियर लिग (ईपीएल)को चौथों संस्करण आयोजनाको संघारमा छ।
पारस र आमिर पुन: एक पटक आमने सामने भएका छन् ।
इपीएलका प्रमोटर हुन्, आमिर । जब ईपीएल आउँछ, पारस–अमिरको टकराव देख्न मिल्छ । ‘वार’ कुनैसमय भित्र–भित्र थियो, अब खुल्लम खुल्ला सुरु भएको छ ।
राष्ट्रिय क्रिकेटका पूर्व कप्तान हुन्, पारस । उनी नेपाली क्रिकेटका सबैभन्दा ठूला स्टार हुन् । र उत्तिकै सफल पनि खेलाडी पनि ।
इन्डियन प्रिमियर लिग (आइपीएल)को नेपाली संस्करण बनाउन खोजेका आमिर क्रिकेटका ब्यापारी हुन् । उनी क्रिकेटमा आएका हुन्, पैसा कमाउन । सार्वजनिक रुपमा उनले भनेका पनि छन् । त्यसो गर्दा क्रिकेट पनि व्यवसायीक हुने भो, गोजी पनि भरिने भयो ।
खेल आखिर राम्रो व्यापार पनि त हो ।
पारस खड्काले ईपीएल नखेल्ने पक्का पक्की जस्तै थियो । त्यसमा थपिएका छन्, ज्ञानेन्द्र मल्ल । राष्ट्रिय क्रिकेट टिमका कप्तान मल्लको ब्याट भर्खरै ओमानमा राम्रै चलेको थियो । तर घर फर्कने वित्तिकै घरेलु फ्रेन्चाइज क्रिकेटको सबैभन्दा ठुलो प्रतियोगिताबाट ज्ञानेन्द्रले नाम झिकेका छन् ।
पारस नखेल्ने भएपछि सबैको अनुमान थियो, सायद ज्ञानेन्द्रले पनि खेल्ने छैनन् । आखिर यस्तै भयो । ज्ञानेन्द्रले ईपीएल नखेल्नु ठुलो कुरा भएन । उनले व्यक्तिगत कारण देखाउँदै ईपीएल नखेल्ने बताएका छन् । तर उनको टिमले निकालेको विज्ञप्तिले धेरैको कुराको संकेत गर्छ । ईपीएलसँग पारस–ज्ञानेन्द्रको अन्तरसंघर्ष प्रकट गर्छ ।
ललितपुरले बिहीबार प्रेस विज्ञप्ति निकालेर ज्ञानेन्द्रले नखेल्ने जानकारी गरायो । विज्ञप्तिमै ज्ञानेन्द्रले पठाएको गोप्य इमेल पनि छाप्यो ।
यसले आयोजक र खेलाडीबीचको सम्बन्ध कुन तहमा रहेछ भन्ने देखाउँछ ।
के हुदैछ क्रिकेटमा ?
नेपाल क्रिकेट संघ (क्यान) एक समय निलम्बनमा थियो । त्यो समय नेपाली क्रिकेट पारस, ज्ञानेन्द्र, शक्ति, बसन्त लगायतका केही सिनियर खेलाडीको सल्लाहमा चल्थ्यो ।
कुनै समयका खेलाडी आमिर क्रिकेटका इभेन्ट गरिरहेका हुन्थे । एनपीएल र ईपीएलको सुरुवाती संस्करणमा आमिरलाई पारसकै सहयोग थियो । ईपीएललाई अन्तराष्ट्रिय क्रिकेट परिषद (आइसीसी)को मान्यता जुटाउन पारस स्वयमले प्रत्यक्ष भूमिका खेलेको बताइन्छ ।
जब ईपीएल सुरु भयो, आमिर–पारस लगायातका खेलाडीबीच द्धन्द बढ्न पुग्यो । ईपीएलको नाम र कर्पोरेटको लगानी अनुसार खेलाडीले पैसा नपाएको पारसको गुनासो रह्यो । देशका ठुला कर्पोरेटसंग उठबस सुरु गरेका आमिरले खेलाडीको गुनासोमा खासै चासो दिएनन् ।
एक समय ईपीएल सकिने बित्तिकै पारसले त्रिवि मैदानमै पत्रकार सम्मेलन गरेर आयोजकसँग असन्तुष्टि पोखेका थिए । धेरैले केही समय कुर्न पारसलाई भनेका थिए । तर पारस रोकिएनन् । ईपीएलको आयोजना स्थलमा रहेको टेन्टमा पत्रकार सम्मेलन गरेर पारसले नाम र लगानी अनुसार खेलाडीले केही नपाएको गुनासो गरे ।
त्यसपछि सार्वजनिक रुपमा पारस–आमिरबीच विवाद बाहिर आएको थियो ।
ईपीएललाई माथ खुवाउन पारस, ज्ञानेन्द्र लगायतका केही खेलाडी मिलेर पोखरा प्रिमियर लिग (पीपीएल) सुरुवात गरे । क्यानका पूर्व कर्मचारी छुम्बी लामाले प्रोजेक्टको नेतृत्व गरे । अनि घरेलु क्रिकेटमा आमिर र पारसको लडाँई ईपीएल भर्सेस पीपीएलमा बदलियो ।
पीपीएलका स्लिपिङ प्रमोटर पारस र ज्ञानेन्द्र इपीएलमा देखिन छाडे । आमिरले समेत पीपीएल खेल्ने विदेशी खेलाडीलाई ईपीएलमा सहभागी नगराउने घोषणा गरे ।
ठुला कर्पोरेटको साथ पाएर आमिरको ईपीएल चढ्दै गयो । खेलाडीको भुमिकामा पारस लगायतको टिमले पीपीएलमा खासै राम्रो गर्न सकेनन् । पीपीएलका धेरै टिम खेलाडीको पैसा नदिएर सम्पर्क विहिन बनेको घरेलु क्रिकेटका सबै सरोकारवालालाई थाहा छ ।
खेलाडी भएर क्रिकेटकै व्यापार गर्न नपाउने भन्दै आमिरले लगातार स्वार्थ बाँझिने मुद्धा उठाइरहे ।
पीपीएलको आगमनसँगै पारस–आमिरको वार आन्तरिक रुपमा चलिरहेको थियो । आइसीसीको पहलमा क्यानमा नयाँ निर्वाचन भयो । मान्छे पुरानै आए, जसको पारस सहितका खेलाडीसँग सम्बन्ध राम्रो थिएन । आमिरले क्यानका उनै पदाधिकारीसँग सम्बन्ध विस्तार गरे । क्यानमा कर्मचारी सहित धेरैलाई प्रभावित बनाए । गत चैतमा क्यानलाई १५ लाख दिएर त्रिकोणात्मक सिरिजनै आयोजना गरेर देखाइदिए । खेल बुझेका पारसले चोटका कारण भन्दै त्रिकोणात्मक सिरिजनै खेलेनन् । तर त्यही सिरिजमा कुशल भुर्तेल यसरी चम्किए, सायद पारसलाई सबैले बिर्सिए ।
कुशलको प्रर्दशनबाट सबैभन्दा बढी कोही खुसी थिए भने ती आमिर थिए । आमिर दाबी गरिरहेका थिए, पारस बिना पनि नेपाली क्रिकेटले जित्छ भन्ने प्रमाणित भएको छ, नयाँ खेलाडीलाई पारस लगायतका खेलाडीको सिन्डिकेटले बाहिर आउन दिएन ।
त्यही सिरिजमा क्रिकेटको सट्टेबाजको विज्ञापन खेल स्थलमा देखियो । कीर्तिपुर प्रहरीमा उजुरीनै पर्यो । आमिर प्रहरी कार्यालयमै पुग्न पर्यो । यो सब घटना पारसकै टिमका सदस्यबाट भएको आमिरको बुझाई रह्यो ।
अब आमिर आक्रमक रुपमा मैदान उत्रन तयार भए ।
सिरिज सक्किने बित्तिकै आमिरले ‘बलियो नेपाल’ नामक एक क्रिकेटको परियोजनामा पारस, ज्ञानेन्द्र, क्यानका कार्यसमिति सदस्य रहेका छुम्बीको संलग्नतामा प्रश्न उठाए । सार्वजनीक रुपमा वक्तव्यबाजी गरे । क्यानलाई पत्र पठाए । आइसीसी जाने धम्की दिए । खेलाडी र पदाधिकारी स्वार्थ बाँझिने काममा संलग्न हुन नपाउने आवाज उठाए । कारबाहीको माग गरे । पारस सहितको टिममाथि ठुलो आक्रमण गरे ।
तुरुन्त पारस सहितको टिमले प्रेस विज्ञप्ति निकालेर त्यसको प्रतिवाद गर्यो । तर पारसमाथि कसैले सार्वजनिक रुपमा औला उठाएको थियो ।
केही हप्तामै पारसले अन्तराष्ट्रिय क्रिकेटबाट सन्यासको घोषणा गरे । आसन्न क्यानको चुनावलाई ध्यानमा राखेर पारसले राष्ट्रिय टिमबाट सन्यास लिएको धेरैको बुझाई रह्यो, पारस स्वयमले त्यसको अस्विकार गरेनन् । तर धेरैले आमिरसँगको पछिल्लो टकरावबाट पारस सो निर्णयमा पुग्न सहयोग गरेको बताउँछन् ।
यहीँ अवस्थामा ईपीएलको नयाँ सिजन सुरु हुदैछ । पुन पारस–आमिर विवाद उत्कर्षमा छ ।
पारस क्रिकेटको राजनीतिमा छिर्ने कोशिश गर्दैछन् । कप्तान र खेलाडीको रुपमा उनी जति बलियो थिए, राजनीतिक रुपमा उनी त्यतीनै कमजोर छन् । कसरी अघि बढ्छन्, त्यो हेर्न बाँकी छ ।
तर आमिर अहिलेको अवस्थामा नेपाली क्रिकेटका ‘पावर सेन्टर’ बनेका छन् । भनिन्छ, ‘क्यान’ नेपाली क्रिकेटको ‘युजर’ नेम हो भने आमिर त्यसको ‘पासवर्ड’ हुन् ।
नेपाली क्रिकेटका दुई ठुला खेलाडीबीचको टकराव सतहमा देखिन्छ । तर दुई शक्तिशाली खेलाडीको अस्वस्थ लडाँईले नेपाली क्रिकेटलाई घाटा पुग्ने क्रिकेट सम्बद्ध अधिकारीहरु बताउँछन् ।
