काठमाडौं । नेपाली राष्ट्रिय क्रिकेट टिमका कप्तान ज्ञानेन्द्र मल्लले एसोसियट राष्ट्रमा आफ्नो प्रभुत्व जमाउन नेपालले धेरै भन्दा धेरै प्रतिस्पर्धात्मक खेल खेल्नुपर्ने बताएका छन् ।
ओमान भ्रमणबाट फर्किएपछि त्रिभुवन अन्तराष्ट्रिय विमानस्थलमा संचारकर्मीसँग कुरा गर्दै कप्तान मल्लले एसोसियटमा टिक्ने भन्दा प्रभुत्व कायम राख्नु पर्ने र त्यसका लागि प्रतिस्पर्धात्मक खेल खेल्नुपर्ने बताएका हुन् ।
'एसोसियटमा कसरी सर्भाइब गर्ने भन्दा पनि एसोसियटमा प्रभुत्व जमाउन धेरै भन्दा धेरै प्रतिस्पर्धात्मक खेल खेल्नु पर्छ जस्तो लाग्छ,' कप्तान मल्लले भने,' क्रिकेटमा प्रतिस्पर्धात्मक खेल चाहिन्छ । त्यसले खेलाडी रोटेट हुन्छ । त्यसमा ध्यान दिनुपर्छ ।'
ओमानमा आईसीसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तराष्ट्रिय सिरिज खेलेर नेपाली टिम मंगलबार बिहान स्वदेश फर्किएका हुन् ।
यस्तै कप्तान मल्लले नेपाली टोलीलाई अझै धेरै 'एक्सपोजर' चाहिएको बताए ।
'टिमलाई अझै अनुभवको कमी छ । प्रेसर हेण्डल गर्ने, दबाब कसरि झेल्ने कुरा हुन्छ । त्यसैले 'एक्सपोजर' चाहिएको छ,' उनले बताए ।
कप्तान मल्लले ओमान भ्रमण राम्रो भएको समेत बताए । उनले विशेष गरि युवा खेलाडीको लागि राम्रो भएको बताए ।
'ओमान भ्रमण डिसेन्ट रह्यो । ३ खेललाई लक्ष्य बनाएका थियौं । राम्रो कुरा चै ओमानलाई धेरै पछि हरायौँ,' कप्तान मल्लले भने, 'यो भ्रमणमा युवा खेलाडीको राम्रो रह्यो । खुशी हुने कुरा युवा खेलाडीमा गरेको लगानीको नतिजा देखिदैछ ।'
ओमानमा भएको सिरिजको ४ खेलमा नेपालले दुई जित निकालेको थियो । सिरिजपछि नेपाल लिग-२ को चौंथो स्थानमा समेत उक्लिएको थियो । नेपालले ८ खेलमा ८ अंक जोडेको छ ।
कप्तान मल्लले लिग-२ मा नेपालको धेरै खेल बाँकी रहेको कारण आगामी खेलमा राम्रो गर्ने बताए । उनले आउने हरेक खेल नेपालका लागि महत्वपूर्ण हुने बताए ।
लिग-२ विश्वकप छनोटको एक रुप हो । सात टोली रहेको लिग-२ मा एक टोलीले ९ सिरिजसहित कुल ३६ खेल खेल्ने छन् ।
लिग-२ को शीर्ष तीन राष्ट्रले २०२३ को जुलाईमा जिम्बावेमा हुने विश्वकप छनोटमा स्थान बनाउने छन् ।
-1748528310.jpeg)
