नेपालविरुद्ध बंगलादेश : पाँच तथ्य

काठमाडौं । एएफसी छनोट खेल्ने तयारीमा रहेको नेपालले आज बिहीबार बंगलादेशसँग मैत्रीपूर्ण फुटबल खेल्दैछ । नेपालसँग दुई मैत्रीपूर्ण फुटबल खेल्न बंगलादेशको टिम काठमाडौंमा छ ।

पुरुष फुटबलको तुलनामा महिला फुटबलले निकै कम अवसर प्राप्त गर्छन् । विश्व फुटबलमात्र हैन, दक्षिण एसियामा अझ नाजुक अवस्था छ । नेपालमा समेत पुरुषको तुलनामा महिला फुटबललाई निकै कम प्राथमिकता राखिन्छ । एन्फाले गत वर्षबाट राष्ट्रिय टिमका महिला खेलाडीलाई समेत पुरुष खेलाडी बराबर तलब, भत्ता दिने निर्णय गरेको छ । तलबमा समानता भएपनि अवसर, सम्मान र ‘एक्सपोजर’मा महिला फुटबल निकै पछि छ ।

विश्वकप छनोटको तयारीका लागि राष्ट्रिय फुटबल टिम लामो समय बन्द प्रशिक्षणमा बस्यो । पर्याप्त मैत्रीपूर्ण फुटबलको अवसर प्राप्त गर्यो । गत चैत्रमा थ्री नेसन्स कपनै खेल्यो । उपाधिनै जित्यो । खेलाडीले राम्रै सम्मान पाए । लगत्तै विश्वकप छनोट हुँदै साफको तयारीमा पुरुष फुटबल टिमले निरन्तर घरेलु र अन्तराष्ट्रिय मैदानमा खेलिरहेको छ । पुरुष टिम भोलि कतार जादैछ, साफको तयारीका लागि । साफ सकिने बित्तिकै एएफसी कपको तयारीमा जुट्छ । अर्थात पुरुष टिमले राम्रो अवसर पाएको छ ।

पुरुषको तुलनामा महिला फुटबल कम प्राथमिकतामा छ । भारतमा अर्को वर्ष हुने एसियन कपको छनोटको तयारीमा नेपाल छ । करिब ६ हप्ताको तयारीपछि नेपालको महिला टिम बंगलादेशविरुद्ध मैत्रीपूर्ण खेलमा उत्रदैछ । कोभिडका कारण लामो समय बुट थन्काएका महिला खेलाडी मैदान निस्कन पाएका छन् । महिला टिमले बिरलै अवसर प्राप्त गर्छ । बंगलादेशविरुद्ध मैदान उत्रदै गर्दा महिला टिमले केही तथ्य स्थापित गर्दैछ ।

पहिलो विदेशी प्रशिक्षक :

महिला खेलाडीको सधै माग हुन्थ्यो, पुरुष जस्तै हामीलाई नि विदेशी प्रशिक्षक चाहियो । तर एन्फाले कहिल्यै त्यो पुरा गर्न सकेन । एन्फाको टेक्निकल डिरेक्टर बनेर आए, ग्यारी फिलिप्स । उनी प्राविधिक काम गर्दै थिए । एन्फाले महिला टिम हेर्ने प्रस्ताव गर्यो । ग्यारीले नाइ भनेनन् । भनिन्छ, ग्यारी नेपाल जस्तो दक्षिण एसियाली मुलुकका लागि एक पाठशाला हुन् । प्रशिक्षकको रुपमा कस्तो देखिन्छन्, केही समय पर्खौ । तर महिला टिमले पहिलो विदेशी प्रशिक्षक पाएको छ । ग्यारी राष्ट्रिय महिला टिमको नेतृत्व गर्ने महिला विदेशी प्रशिक्षक हुनेछन् ।

दशरथ रंगशालामा महिला टिमको डब्यु :

नेपालको महिला टिमको इतिहास तीन दशक भन्दा लामो छ । एकिन नहुन सक्छ, राष्ट्रिय महिला टिमले अहिलेसम्म दशरथ रंगशालामा खेलेका छैनन् । जति पनि प्रतियोगिता खेलेका छन्, ती सबै देश बाहिरै खेलेका छन् ।

केही प्रतियोगिता नेपालमैपनि आयोजना भए, तर दुर्भाग्य महिला टिमले दशरथ रंगशालामा खेल्न पाएन । बंगलादेशविरुद्ध मैदान उत्रदै गर्दा राष्ट्रिय महिला टिमले दशरथ रंगशालामा समेत डेब्यु गर्नेछ ।

फ्लड लाइटमा खेल :

नेपालमा जति पनि खेल हुन्थे, अधिकांश दिउँसो हुन्थे । पछिल्लो समय अन्तराष्ट्रिय खेलहरु फ्लड लाइटमा हुन थालेका छन् । अब महिला टिमले समेत दशरथ रंगशालामा पहिलो पटक फ्लड लाइटमा खेल्न पाउने भएको छ । फ्लड लाइटमा अभ्यस्त नहुदा महिला टिमलाई विदेशमा खेल्न गाह्रो हुने तथ्य सार्वजनीक नभएको हैन । घरेलु मैदानमा आयोजित मैत्रीपूर्ण खेलनै महिला टिमले फ्लड लाइटमा पहिलो पटक खेल्न लागेको हो ।

टिकटबाट आउने स्रोत सुक्न थालेपछि एन्फा पनि फ्लड लाइटमा खेल खेलाउन आकर्षित हुन थालेको हो । दर्शकले समेत आफ्ना काम सकेर दशरथ रंगशालामा फुटबलको मज्जा लिन पाएका छन् ।

अपराजित नेपाल :

नेपालले बंगलादेविरुद्ध जतिपनि खेलेको छ, सबैमा अहिलेसम्म अपराजित छ । नेपालले बंगलादेशविरुद्ध खेलेका ६ मध्य कुनैपनि खेलमा हार ब्यहोरेको छैन ।

नेपाल बंगलादेशविरुद्ध सधै हाबी हुदै आएको छ । दुवै टिम प्राय साग गेम्स र साफ गेम्समा भेटिने गर्छन् । तर नेपालले बंगलादेशलाई सधै हराउँदै आएको छ ।

साम्बाको अभाव :

सावित्रा भण्डारी नेपाल मात्र हैन, दक्षिण एसियाकै एक नम्बरकी फरवार्ड हुन् । राष्ट्रिय फुटबल टिमकी मुख्य फरवार्ड सावित्राबिनै नेपाल बंगलादेशविरुद्ध मैदान उत्रदैछ । मैदानमा गोलका लागि निकै भोक देखाउने सावित्रा यतिबेला उपचारका लागि कतारमा छिन् । सावित्रा एन्टेरियर क्रुसियल लिगामेन्टको सल्यक्रिया गरेर आराम गरिरहेकी छिन् । 

बंगलादेशविरुद्ध उत्रदै गर्दा सावित्रा पक्कै मिस हुनेछिन् । उनलाई दुवै टिमले सम्झिनेछन् । सावित्रा नहुदाँ बंगलादेशलाई डिफेन्समा दबाबमा हुनेछैन । नेपाल दशरथ रंगशालामा नयाँ सावित्राको खोजीमा रहनेछ ।