काठमाडौं । कैलालीको जानकी गाउँपालिकाले आगामी कात्तिक महिनाबाट सुरु हुने उपमेयर कप राष्ट्रिय महिला लिग फुटबल प्रतियोगितामा प्रतिस्पर्धा गर्ने भएको छ।
जानकी गाउँपालिकाकाले बुधबार उपमेयर कप राष्ट्रिय महिला लिग फुटबल प्रतियोगितामा सहभागिता जनाउने निर्णय गरेको हो ।
गाउँपालिकाका अध्यक्ष प्रदीप कुमार चौधरी र उपाध्यक्ष उमा महतोसहित पालिका पदाधिकारीहरु बुधबार कटासे फुटबल ग्राउण्डमा उपस्थित हुँदै उक्त घोषणा गरेका हुन् ।
यस्तै अध्यक्ष, उपाध्यक्ष लगायत पदाधिकारीहरुले विभिन्न वडाबाट छनौट भएका ६५ खेलाडीहरुसँग अन्तरक्रिया गर्दै हौसला प्रदान गरेका थिए ।
'कैलालीका अन्य नगपालिका र गाउँपालिकाले के गर्छन् थाह भएन', गाउँपालिका अध्यक्ष चौधरीले भने, 'तर हाम्रो पालिकाले आफ्नो ठाउँलाई राष्ट्रिय स्तरमा चिनाउनका लागि र स्थानीय प्रतिभालाई केन्द्रीय स्तरमा क्षमता देखाउने अवसर प्रदान गर्न एन्फाले आयोजना गरेको राष्ट्रव्यापी प्रतियोगितामा सहभागी हुने निर्णयमा पुगेका हौं ।'
अध्यक्ष चौधरीले प्रारम्भ्कि चरणमा छनौट भएका खेलाडीहरुको डाइट र स्वास्थ्यजन्य किट्स छिट्टै उपलब्ध गराउने जानकारी दिए ।
गाउँपालिका उपाध्यक्ष उमा महतोले खेलाडी छनौट र तालिम प्रक्रियामा पालिका र रारा फाउण्डेशनसँगको सहकार्य उदाहरणीय काम भएको बताइन् ।
उनले भनिन्, 'यो दुरदराजका खेलाडीलाई आफ्नो प्रतिभा देखाउने स्वर्ण मौका पनि हो । हामीले जसरी कटासें फुटबल ग्राउण्ड निर्माणमा सहयोग गरिरहेका छौं, त्यसैगरी महिला फुटबल अभियानलाई निरन्तरता दिन पनि पालिकाको पूर्ण सपोर्ट रहनेछ ।'
टिमको प्रशिक्षक टोलीमा लक्ष्मी श्रेष्ठ र सुदूरपश्चिमका चर्चित फुटबल खेलाडी माधव भण्डारीले सम्हाल्ने छन् ।
प्रशिक्षक श्रेष्ठले डेढ महिनाको अवधिमा छनौट भएका खेलाडीहरुलाई क्लोज क्याम्पमा राखेर अध्यापन सँगसँगै फुटबल प्रशिक्षण दिनुपर्ने चुनौति रहेको बताईन् ।
प्रारम्भिक छनौट घोषणा कार्यक्रममा मनुवा कञ्चनपुरबाट ३, सुवर्णपुर, लायकपुरबाट ९, जगतपुरबाट ११, पालबजारबाट १७ र कटासेबाट २५ जना सहभागी भएका छन् ।
६५ जनालाई १० दिन संयुक्त रुपमा प्रशिक्षण दिइनेछ । त्यसपछि ३० जनालाई छनौट गरी उनीहरुलाई पूर्णरुपमा क्लोज क्याम्पमा राखेर प्रशिक्षण दिइने प्रशिक्षक लक्ष्मीले जानकारी दिइन्।
-1751696964.webp)
