काठमाडौं । नेपालले एएफसी छनोटको तयारीका लागि बुधबार बंगलादेशसँग मैत्रीपूर्ण फुटबल खेल्दैछ । नेपालसँग दुई मैत्रीपूर्ण फुटबल खेल्न बंगलादेशको राष्ट्रिय महिला टिम काठमाडौंमा छ । पहिलो मैत्रीपूर्ण खेल बिहीबार दशरथ रंगशालामा हुनेछ । दोस्रो खेल आईतबार हुनेछ ।
पहिलो मैत्रीपूर्ण खेलको अघिल्लो दिन बुधबार दुवै टिमका मुख्य प्रशिक्षक पत्रकार सम्मेलनमा उपस्थित रहे । दुवै प्रशिक्षकले नेपालको राष्ट्रिय महिला टिमकी फरवार्ड सावित्रा भण्डारीको प्रशंसा गरे ।
नेपालको राष्ट्रिय टिमका मुख्य प्रशिक्षक ग्यारी फिलिप्सले कोभिडको कठिन अवस्थामा बंगलादेशविरुद्ध खेल्न पाउनु अवसर रहेको बताए । उनले मैत्रीपूर्ण खेलका लागि ६ हप्ताको तयारी गरेको उल्लेख गर्दै चोटका कारण केही खेलाडी गुमाएको बताए ।
‘नयाँ खेलाडीलाई टिममा स्थान सुरक्षित गर्न मौका छ ।’ उनले भने ।
प्रशिक्षक फिलिप्सले मुख्य फरवार्ड सावित्रा भण्डारी ‘साम्बा’ नेपालको टिममा नहुनु सबैभन्दा ठुलो घाटा भएको बताए ।
‘साम्बा हामीसँग नहुनु ठुलो घाटा हो । साम्बा बिना शारिरिक र मानसिक रुपमा टिमलाई धेरै तनाव हुन्छ ।’ उनले भने, ‘उनले आईलिगसम्म खेलेकी छिन् र सर्वाधिक गोलकर्ता पनि बनेकी छिन् ।’
फिलिप्सले मेस्सी बिनाको बार्सिलोना र माटा बिनाको ब्राजिली टिमलाई जस्तै साम्बाको अभाव खट्कने बताए ।
सावित्रा उपचारका लागि कतारमा छिन् । सावित्राको एन्टेरिएर क्रुसियल लिगामेन्ट (एसिएल)को शल्यक्रिया कतारमा भएको हो । महिला राष्ट्रिय लिगको दौरान सावित्राले चोट बोकेकी छिन् ।
उनले कुनै नयाँ खेलाडीले साम्बाको स्थान लिन सक्ने बताए । फिलिप्सले नेपालको टिममा दुई–तीन पोजिसनमा कुनैपनि खेलाडीले स्थान बनाउन सक्ने उल्लेख गरे ।
बंगलादेशका प्रशिक्षक गोलाम छोटनले नेपालविरुद्धको मैत्रीपूर्ण खेलले एएफसी कपको छनोटमा सहयोग पुग्ने बताए ।
उनले टिमका अधिकांश खेलाडी उमेर समूहको टिमबाट आएको उल्लेख गर्दै खेलाडीले लामो समय संगै खेलेकाले फाईदा पुग्ने बताए । उनले नेपालविरुद्धको खेल निकै प्रतिस्पर्धात्मक हुने अपेक्षा गरे ।
बंगलादेशी प्रशिक्षकले समेत नेपाली फरवार्ड साम्बाको खुलेर प्रशंसा गरे ।
‘नेपाल राम्रो टिम हो तर हामी खेलका लागि तयार छौं । नेपाल उत्कृष्ट लयमा छ ।’ छोटनले भने, ‘साम्बा दक्षिण एसियाकै उत्कृष्ट फरवार्ड हुन् । उनी यहाँ नहुनु दुखद हो ।’
-1751696964.webp)
