मनाङलाई टोयोटाको प्रायोजन

काठमाडौं । मनाङ मर्स्याङ्दी क्लबलाई टोयोटा नेपालले प्रायोजन गरेको छ ।

टोयोटा नेपालको आधिकारिक विक्रेता युनाईटेड ट्रेड मोटर्सले ए डिभिजन क्लब मनाङलाई दुई वर्षका लागि प्रायोजन गरेको हो ।

बिहीबार एक कार्यक्रमकाबीच मनाङका महासचिव तेन्जिङ गुरुङ र युटीएसका बिजनेस रिसर्च एनालिस्ट सुर्यांश वैद्यले सम्झौता पत्रमा हस्ताक्षर गरे ।

सम्झौता अनुसार टोयोटा नेपालले मनाङलाई दुई वर्षको २० लाख रुपैयाँ उपलब्ध गराउनेछ । मनाङले क्लबको आधिकारिक जर्सीमा टोयोटालाई स्थान दिनेछ ।

घरेलु फुटबलको सर्वाधिक सफल क्लब मनाङको मुख्य प्रायोजकको रुपमा नेपाल आयल निगम रहेको छ ।

केटीएम सिटी मनाङको किट्स पार्टनरको रुपमा रहेको छ । युटिएसका रिसर्च एनालिस्ट सुर्यान्स वैद्यले खेलकुद र अटोमोवाइल क्षेत्र देशकै ठुलो क्षेत्र उद्यम रहेको उल्लेख गर्दै यस प्रायोजनले सरकारको लगानी र आसोको पनि आवश्यकतालाई पुष्टि गर्ने बताए ।

कार्यक्रमको मुख्य अतिथी बनेका एन्फा अध्यक्ष कर्माछिरिङ शेर्पाले ठुला व्यवसायीक घराना फुटबलमा पुन फर्कन थालेको खुसी व्यक्त गरे । उनले यस प्रकारको सम्झौताले फुटबलमा नयाँ आशा जगाएको बताए ।

युटिएसका अध्यक्ष सुरज वैद्यले समय कठिन भएपछि अघि बढ्नुपर्ने उल्लेख गर्दै खेलकुदमार्फत विश्वलाई देश चिनाउन सकिने धारणा राखे । उनले खेलकुदमा सहयोग आगामी दिनमा थप बढ्ने आशा व्यक्त गरे ।

मनाङ मस्याङ्दी क्लबले नयाँ सिजनको शहीद स्मारक ए डिभिजन लिगको तयारी गरिहेको छ ।

यस वर्षका लिग कात्तिक २८ गतेबाट सुरु हुदैछ । लिगका लागि मनाङले खेलाडी अनुबन्धनको प्रक्रियालाई अन्तिम चरणमा पुर्याएको छ ।

गत महिनामात्र मनाङले आधिकारिक खेल सामाग्री पार्टनरको रुपमा केटीएम सिटीसंग सम्झौता गरेको थियो ।